Maıqudyqtaǵy jol jóndeý jumysy qashan aıaqtalady

QARAǴANDY. QazAqparat – Qaraǵandynyń Maıqudyq shaǵyn aýdanyndaǵy eń uzyn joldardyń birinde jóndeý jumysy jýyrda aıaqtalady. Qala ákimi atqarylǵan jumys týraly aıtyp berdi, dep habarlaıdy QazAqparat tilshisi.

Qaraǵandy ákimi Ermaǵanbet Bólekpaev Maıqudyqtaǵy joldyń kúrdeli jóndelýi týraly aıtyp berdi.

Qala basshysynyń aıtýynsha, jol tósemin aýystyrý jumystary jýyrda támamdalady.

Sondaı-aq, jaqyn arada aıaldamalardy abattandyrý aıaqtalady.

«Maıqudyqtaǵy Magnıtogor jáne Karl Marks kóshelerindegi avtomobıl jolyn kúrdeli jóndeýge kelsek, biz aıaqtalý satysynda turmyz dep aıtýǵa bolady. Jóndeý jumysy «Syrdarııa» aıaldamasyna deıin jetip, abattandyrý jumysy qarqyndy júrip jatyr. Joldyń ekinshi bóligin – «Syrdarııadan» 14 magıstralǵa deıin (HMK) osy aptada ashamyz», - dep atap ótti qala ákimi.

Qazir jaryqtandyrý, baǵdarshamdar, jaıaý júrginshiler ótkelderi, belgiler, trotýarlar tóselýde.

Qala bıligi bul jumystardy jaqyn arada aıaqtaýdy josparlap otyr.

«Maıqudyq jolynda trotýarlardy jaryqtandyrý da júrgizilip jatqanyn atap ótkim keledi – 1000-ǵa jýyq jaryq núkteleri paıda bolady. Sondaı-aq, biz jol shetterin abattandyrýmen jáne aıaldama pavılondaryn jańartýmen aınalysamyz. Bıylǵy jyly abattandyrýǵa qatysty barlyq jumystar «Syrdarııa» aıaldamasyna deıin oryndalatyn bolady. Biz dál osyndaı mindet qoıyp otyrmyz», - dedi Ermaǵanbet Bólekbaev.