Maıkrosoft korporatsııasy 8 sáýirden bastap Windows XP júıesin tehnıkalyq qoldaýdy toqtatady
ASTANA. QazAqparat - Maıkrosoft korporatsııasy 8 sáýirden bastap dúnıejúzi boıynsha Windows XP operatsııalyq júıesin tehnıkalyq jaǵynan qoldaýdy toqtatady. Bul týraly kompanııanyń resmı saıtynda habarlandy.
«Maıkrosoft korporatsııasy 12 jyl boıy Windows XP júıesin qoldap keldi. Endigi jerde bizge jáne bizdiń áriptesterimizge jumys jasaýdyń tıimdi tásilderin qoldanýǵa múmkindik beretin zamanaýı tehnologııalarǵa ınvestıtsııa salý qajet. Sondyqtan 2014 jyldyń 8 sáýirinen bastap biz Windows XP-diń tehnıkalyq qoldaýyn toqtatyp, kompıýterdiń qorǵanysyn kúsheıtetin avtomattyq jańarý júıelerin shyǵarýdy doǵaramyz», - delingen habarlamada.
Habarlamada kórsetilgendeı, atalǵan kúnnen bastap qoldanýshy Windows XP úshin Microsoft Security Essentials baǵdarlamasyn júkteı almaıdy. Eger Windows XP-di qoldanýdy jalǵastyra berse, kompıýter vırýstar men túrli qaýipsizdik sharalaryna qarsy baǵdarlamalarǵa osal bolyp qalady. Sarapshylar qaýipsizdik maqsatynda jeke kompıýterdiń baǵdarlamalyq qamtamasyz etý júıesin jańartýǵa keńes beredi.
