«Maıkrosoft qazaqshaǵa tolyq kóshetin boldy» - respýblıkalyq basylymdarǵa sholý
ASTANA. Naýryzdyń 2-si. /QazAqparat/ - Qazaq aqparat agenttigi respýblıkalyq basylymdarda naýryzdyń 2-si, seısenbi kúni shyqqan ózekti materıaldarǵa sholýdy usynady.
Premer-Mınıstr Kárim Másimovtiń tóraǵalyǵymen ótken keshegi Úkimet otyrysynda aǵymdaǵy jylǵa arnalǵan respýblıkalyq bıýdjet ólshemderi naqtylandy. Bul naqtylaý Elbasy Joldaýynda kórsetilgen tapsyrmalardy júzege asyrý úshin jáne "Qazaqstan Respýblıkasynyń Ulttyq qorynan 2010-2012 jyldarǵa arnalǵan kepildendirilgen transfert týraly" zań jobasynyń ázirlenýine baılanysty júrgizildi. Tolyǵyraq «Egemen Qazaqstan» basylymynyń búgingi sanyndaǵy «Prezıdent bıznesti qorǵaıdy» degen taqyryppen berilgen maqaladan oqı alasyzdar.
Búginde jasy toqsanǵa kelip otyrǵan Qazaqstannyń halyq ártisi Kúlásh Sákıeva óziniń jetpis jyldyq shyǵarmashylyq ómirinde 150 den astam rólderdi oınaǵan eken.«Egemen Qazaqstan» gazetiniń búgingi sanyndaǵy «Aktrısa» taqyrybymen berilgen maqalasahna sańlaǵy Kúlásh Sákıeva týraly sóz qozǵaıdy.
***
Qalaýlylar Barys jylynyń kóktemin jaqsy jańalyqtarman qarsy alǵysy kelse kerek, keshe, naýryz aıynyń birinshi kúninde olar Aqparattandyrý jáne baılanys agenttiginiń tóraǵasyn tyńdaýdy jón dep taýypty. Osyǵan baılanysty «Aıqyn» basylymynyń búgingi sanynda «Maıkrosoft qazaqshaǵa tolyq kóshetin boldy» atty maqala jaryq kórdi. Aty aıtyp turǵandaı, maqalada Maıkrosoft kompanııasynyń qazirgi operatsııalyq júıeleri bıylǵy jyly tegisimen qazaq tiline kóshiriletindigi jazylypty.
«Qazaqstan orbıtaǵa ǵarysh apparattaryn shyǵarýǵa múmkindik aldy»,- deıdi Ulttyq ǵarysh agenttiginiń tóraǵasy, Reseıdiń jaratylys ǵylymdary akedemııasynyń múshesi, akademık Talǵat Musabaev «Aıqyn» gazetine bergen suhbatynda. «Baıqońyr» kesheni Reseıge qandaı kólemde paıda ákeledi, odan Qazaqstanǵa birdeńe tıe me? Kelesi qazaq ǵaryshqa qashan ushady? Osy jáne basqa da ózekti máseleler tóńireginde ǵaryshkermen oı bóliskińiz kelse, basylymnyń «Aq sóıle!» aıdaryna nazar aýdaryńyz.
Keshe qystyń sońǵy kúni edi. Aqpan aıymen qosa, Aq Olımpıada da óz máresine jetti. Oqyrmandardy «Tórt jyldyqtyń basty jarysy qalaı ótti?», «Qandaı oqıǵalar oryn aldy?» degen sansyz suraqtar mazalaıtyny sózsiz. «Aıqyn» gazetiniń búgingi sanyndaǵy «Aq Olımpıadanyń alaýy sóndi» degen taqyryppen berilgen maqala Vankýverdegi jarystyń sońǵy úsh táýliginiń qortyndysyna toqtalypty.
***
«Et degende bet bar ma?» dep, et jegende aldyna jan salmaıtynyn jasyrmaǵan qazaq etten qol úzgen kúni qazaq bolýdan da qalatyn sekildi. Alaıda sol qazaq búgin sapaly et ónimderin tutyný máselesi boıynsha keıin tartyp barady... Árıne, et satatyn dúkender de, bazarlar da kez kelgen qalada kóp. Biraq sol kóptiń bári birigip bir máseleni sheshe almaı keledi. Ol taǵy da sol et óniminiń sapasy, sanıtarlyq talapqa saı, adal túrimen qala halqyn qamtamasyz etý máselesi»,- dep jazady «Astana aqshamy» basylymynyń búgingi sany. Et bazaryndaǵy jaǵdaıdy bilgińiz kelse, «Adal etten alyńyz» degen taqyryppen berilgenmaqalany oqyńyzdar.
Zamanymyzdyń poezııa salasynda eren eńbekterimen erekshelengen jyr júırigi Іlııas Jansúgirovtiń ómiriniń sońǵy kúnderiniń keıbir tustary belgili bolǵanmen, kóptegen jaǵdaılar qupııa bolyp keledi. Osy orny tolmas olqylyqtardy túzetý maqsatynda Taldyqorǵan qalasyndaǵy aqyn murajaıynyń qyzmetkerleri sony izdenister jasapty. Іlııas Jansúgirovtiń atylýyna baılanysty arhıv qujattarymen tanysqyńyz kelse, «Astana aqshamy» gazetiniń búgingi sanyndaǵy «Aqyn ómiriniń aqyrǵy sátteri» atty maqalaǵa nazar aýdaryńyz.
***
«Alash aınasy» basylymynyń turaqty «DAT» aıdarynda Májilis depýtaty Nurtaı Sabılıanovpen bolǵan suhbat jaryq kóripti. Suhbatta Shyǵys Qazaqstandaǵy qystyń qahary, shekara qaýipsizdigi jáne basqa da ózekti máseleler sóz bolady. «Men ekonomıst retinde respýblıkalyq jáne jergilikti bıýdjetten bólinip jatqan qarjylar qatań baqylaýǵa alynsa deımin. Osy memlekettiń aqshasyn alaqanynda ustap otyrǵan tıisti mekeme qyzmetkerlerine aıtarym, ár teńgeniń únemdi jáne zańmen belgilengen maqsatta jumsaýda ózderine qatań talap qoısa eken»,-deıdi Nurtaı Sabılıanov gazettegi suhbatynda.
«Biz qashan qazaqsha kúlemiz?» Osyndaı saýalǵa qurylǵan «Alash aınasy» gazetindegi kelesi maqala qazirgi kezde qaptap ketken maǵynasyz baǵdarlamalardy synǵa alypty. «Qazir biz kimge, nege kúlip júrmiz osy? Bizdiń kúlkimizden qaı ulttyń ısi ańqıdy? Keıingi kezderi meni osyndaı oı mazalap júr. Oǵan túrtki bolǵan - qazirgi kezdegi qaptap ketken aty ázil, zaty ájýa baǵdarlamalar. Qaı arnany qossań da kóz aldyńa kólbeń etip shyǵa keletin osy jobalardyń kópirshikteı qur kópirgeni bolmasa, ishindegi ilip alary az ǵana», - deıdi gazet tilshisi.
