Maıkrosoft Internet Explorer braýzerinen bas tartty
ASTANA. QazAqparat - Maıkrosoft kompanııasy Internet Explorer brendin ári qaraı damytýdan bas tartty, dep habarlaıdy TheVillage. Bul týraly kompanııanyń marketıng bóliminiń basshysy Krıs Kapossel AQSh-taǵy Convergence konferentsııasy barysynda málim etken.
2015 jyly jazda resmı túrde iske qosylatyn Windows 10 operatsııalyq júıesindegi negizgi oryndy Project Spartan kodtyq ataýyna ıe jańa braýzer almaq. Onyń resmı ataýy áli oılastyrylyp jatyr. Syrttaı qaraǵanda ol Google Chrome-ǵa uqsaıdy, al jyldamdyǵy jaǵynan Internet Explorer-den birneshe ese artyq bolmaq.
Esterińizge sala keteıik, Internet Explorer braýzeri Windows operatsııalyq júıesinde alǵash ret 1995 jyly paıda bolǵan edi. Ol qazirgi ǵalamtor paıdalanýshylary arasynda Chrome braýzerinen keıin keńinen tanymaldylyqqa ıe. Alaıda, sarapshylar onyń baıaǵydan-aq jańartýdy qajet etetinin aıtyp kelgen edi.
