Maıkl Djordannyń qoltańbasy bar kartochka 1,44 mln dollarǵa satyldy
NUR-SULTAN. QazAqparat – Aty ańyzǵa aınalǵan amerıkalyq basketbolshy Maıkl Djordannyń qoltańbasy bar sırek kezdesetin kollektsııalyq kartochka Heritage aýktsıonynda rekordtyq 1,44 mln dollarǵa satyldy. Bul týraly QazAqparat TMZ Sports portalyna silteme jasap habarlaıdy.
Kartochka 1997 jyly 23 dana bolyp shyqqan. Onda «naqty qoltańba» men sportshynyń 1992 jyly Ulttyq basketbol assotsıatsııasynyń (NBA) ańyzǵa aınalǵan Juldyzdar matchynda oınaǵan fýtbolkasynyń bir bóligi bar.
Satyp alǵan adamnyń aty atalmady.
Maıkl Djordannyń buǵan deıingi kollektsııalyq kartochkalarynyń rekordtyq quny 915 myń dollar bolǵan. Ol da birneshe aı buryn Heritage aýktsıonynda tirkelgen edi.
Al byltyr tamyzda sportshynyń krossovkasy Christie's aýktsıonynda 615 myń dollarǵa satyldy.
Maıkl Djordan eki dúrkin Olımpıada chempıony (1984, 1992) jáne «Chıkago» quramynda alty dúrkin UBA chempıony atanǵan. Sondaı-aq ol «Vashıngton» sapynda oınap, 2003 jyly sol komandada karerasyn aıaqtady.
