Maıkl Djordan eń kóp tabys tapqan sportshy atandy

ASTANA. KAZINFORM - Amerıkalyq basketbolshy Maıkl Djordan Sportico nusqasy boıynsha qarjylyq jaǵynan eń tabysty 50 sportshynyń tizimin bastady. 

Zertteýge sáıkes, aty ańyzǵa aınalǵan sportshy óz mansabynda ınflıatsııany esepke alǵanda, (ınflıatsııany esepke almaǵanda 3 mlrd) 4,15 mlrd dollarǵa jýyq tabys tapqan.

Bul soma basqa tıtýldy sportshylardyń tabysynan aıtarlyqtaı asyp túsedi. Amerıkalyq golf oıynshysy Taıger Výds 2,79 mıllıard dollar tabysymen ekinshi orynda, úzdik úshtikti Portýgalııa fýtbolshysy Krıshtıaný Ronaldý 2,23 mıllıard dollarmen túıindedi.

Djordannan aıyrmashylyǵy, bul sportshylar belsendi sporttyq mansabyn jalǵastyrýda.

Basketbolshy Lebron Djeıms (1,88 mıllıard dollar) pen fýtbolshy Lıonel Messı (1,85 mıllıard dollar) bestikke endi. Úzdik ondyqty amerıkalyq golfshylar Arnold Palmer men Djek Nıklaýs, fýtbolshy Devıd Bekhem, tennısshi Rodjer Federer jáne boksshy Floıd Meıvezer aıaqtady.

Tizimdegi basqa da kórnekti sportshylar qatarynda 1,39 mıllıard dollar tabysymen 12-shi oryn alǵan Formýla-1 jarysýshysy, jeti dúrkin álem chempıony, kóptegen Formýla-1 rekordtarynyń júldegeri Mıhael Shýmaher jáne 25-tikke engen eń kóp tabys tapqan amerıkalyq fýtbolshy Tom Bredı bar. Eń tabysty beısbolshy 22-shi orynǵa ıe bolǵan Aleks Rodrıges boldy.

Tizimdegi barlyq 50 sportshynyń jıyntyq tabysy ınflıatsııany eskere otyryp, 53,2 mıllıard dollardy qurady. Bir qyzyǵy, tizimde tek segiz sport túrinen sportshylar bar, al ondaǵy jalǵyz áıel tennısshi Serena Ýılıams, ol 40-orynǵa turaqtaǵan.

Eske sala keteıik, Forbes álemdik reıtıngine qansha qazaqstandyq mıllıarder engeni jaıly jazǵan edik.