Maıkl Djeksonnyń qaryndasy 50 jasynda tuńǵyshyn dúnıege ákeldi
ASTANA. QazAqparat - Tanymal amerıkalyq ánshi Djanet Djekson 50 jasynda alǵashqy shaqalaǵyn dúnıege ákeldi, dep habarlaıdy QazAqparat.
People jýrnaly ánshiniń ókiline silteme jasap jazýynsha, qazan aıynda Djekson júkti ekendigin rastaǵan. Ol kezde basylym aıaǵy aýyr ánshiniń túgel aq kıimge kıingen sýretin ornalastyrǵan bolatyn.
Pop-mýzyka koroli Maıkl Djeksonnyń kishi qaryndasy otbasyn josparlaýǵa den qoıý úshin álemdik týrneden bas tartatynyn sáýir aıynda-aq málimdegen bolatyn.
Ol 2012 jyldyń jeltoqsanynda Katar mıllıarderi Vıssam al-Manmen jasyryn túrde nekeleskeni habarlanǵan bolatyn.
Djanet Djekson sahnaǵa 7 jasynan shyǵa bastady. 1976 jyly The Jacksons serıalyna tústi. 16 jasynda Djekson A&M rekord-leıblimen kelisimshartqa qol qoıdy, kóp uzamaı onyń alǵashqy albomy jaryqqa shyqty. Billboard jýrnalynyń málimetinshe, ánshi pop-mýzyka tarıhyndaǵy satylymy eń joǵary oryndaýshylardyń tizimine enedi.
