Maıkl Djeksonnyń dárigeri merziminen buryn bostandyqqa shyqty
ASTANA. 29 qazan. QazAqparat - Maıkl Djeksondy abaısyzda óltirip, tórt jylǵa sottalǵan dáriger Konrad Mıýrreı merziminen buryn bostandyqqa shyqty, dep habarlaıdy Ýtro.rý.
CNN habarlaýynsha, Mıýrreı Los-Andjeles okrýgynyń túrmesinde eki jyldaı otyrdy. Ol túrmeden eki-aq ret: bir ret aýrýhanaǵa, jáne bir ret - sotqa shyǵarylǵan. Ony úlgili tártibi úshin merziminen buryn bosatýǵa sheshim qabyldandy.
Pop-mýzyka koroli Maıkl Djekson 2009 jyly 25 maýsymda óziniń Los-Andjelestegi úıinde 51 jasqa qaraǵan shaǵynda qaıtys boldy. Polıtsııa anyqtaǵandaı, óler aldynda ol uıyqtatatyn kúshti dári qabyldaǵan.
2011 jyly qańtarda ánshiniń jeke dárigeri Konrad Mıýrreıge abaısyzda óltirgeni úshin aıyp taǵylǵan, al qarasha aıynda ol tórt jylǵa sottaldy.
Bas bostandyǵynan aıyrýmen qatar, sot dárigerge Djeksonnyń balalaryna ótemaqy tóleýdi taǵaıyndady. Onyń mólsheri juldyzdy jerleýge ketken shyǵyn - $1,8 mln. dollar jáne kelisimshart boıynsha Djeksonǵa ótkizilmeı qalǵan 50 kontserti úshin tólenýi tıis bolǵan 100 mln. dollar kóleminde baǵalanýda. Sonymen qatar, Mıýrreı medıtsınalyq lıtsenzııasynan aıyryldy.
