Maıkl Djeksonnyń shulyǵy aýktsıonda 6200 eýroǵa satyldy

ASTANA. KAZINFORM — 1997 jyly Nıtstsada ótken kontsert kezinde Maıkl Djekson kıgen, krıstaldarmen áshekeılengen shulyq Frantsııadaǵy aýktsıonda sársenbi kúni 6200 eýroǵa satyldy, dep AZÁRTADJ jazdy.

Aýktsıon uıymdastyrýshylary bul shulyqty «kýlttik buıym» dep atap, mýzykalyq jádigerlerdiń satylymyna engizgen.

AZÁRTADJ sheteldik BAQ-qa silteme jasaı otyryp habarlaǵandaı, tehnık mamandardyń biri bul shulyqty Djeksonnyń grım bólmesiniń mańynda kontsertten keıin tastalǵan kúıde taýyp alǵan.

Pop mýzykasynyń koroli bul aq tústi sporttyq, jyltyr tastarmen bezendirilgen shulyqtardy 1997 jylǵy HIStory World Tour álemdik týrne kezinde kıgen.

Maıkl Djeksondy bul shulyqpen «Billie Jean» ánin oryndap jatqan beınebaıandardan kórýge bolady.

Odan beri birneshe onjyldyq ótse de, shulyq áli saqtaýly. Degenmen, ol aqtyǵyn joǵaltyp, daqtar paıda bolyp, tastardyń túsi sarǵaıyp ketken.

Bul buıym bastapqyda maýsym aıynda aýktsıonǵa qoıylǵanymen, sol kezde satyp alýshy tabylmaǵan. Bastapqy baǵasy 2500 eýro bolǵan, al boljamdy quny 3000–4000 eýro shamasynda dep baǵalanǵan edi.

Buǵan deıin habarlanǵandaı, amerıkalyq aktrısa Andjelına Djolı qarasha aıynda 1958 jyly shyǵarylǵan Ferrari 250 GT kóligin aýktsıonǵa qoıady.