Maıkl Djekson týraly fılm álemdik prokatta 217 mln dollar jınap, rekord ornatty
ASTANA. KAZINFORM – Maıkl Djekson týraly túsirilgen ómirbaıandyq «Maıkl» fılmi prokattyń alǵashqy kezeńinde rekordtyq tabysqa qol jetkizip, álem boıynsha 217,4 mln dollar jınady, dep habarlaıdy Associated Press agenttigi.
Lionsgate stýdııasynyń málimetinshe, atalǵan somanyń 97 mln dollary AQSh pen Kanada naryǵyna tıesili.
Kartına mýzykanttar týraly túsirilgen ómirbaıandyq fılmder arasynda jańa rekord ornatyp, buǵan deıin janr kóshbasshysy sanalǵan «Straight Outta Compton» jáne «Bogemalyq rapsodııa» fılmderiniń bastapqy kassalyq kórsetkishterinen asyp tústi.
Halyqaralyq prokatty kóptegen naryqtarda Universal Pictures kompanııasy júzege asyrdy. Joba Lionsgate stýdııasy úshin eń táýekeli joǵary jobalardyń biri sanaldy. Djeksonnyń tulǵasy oǵan qatysty seksýaldyq zorlyq-zombylyq aıyptaýlaryna baılanysty áli kúnge deıin pikirtalas týdyryp keledi. Ánshi bul aıyptardy joqqa shyǵarǵan, al 2005 jyly sot ony aqtap shyqqan.
Fılm ónerpazdyń otbasy ishinde de túrli pikir týǵyzdy. Atap aıtqanda, Djanet Djekson túsirilimge qatyspasa, ánshiniń qyzy Perıs Djekson kartınaǵa syn aıtqan.
Basty róldi ánshiniń jıeni Djaafar Djekson somdady.
«Maıkl» fılminiń sátti bastalýy Gollıvýdtaǵy kóktemgi maýsymnyń joǵary qarqynyn jalǵastyrdy. Basqa kassalyq hıtterdiń qatarynda Amazon MGM Studios túsirgen «Proekt «Haıl Merı» jáne Universal usynǵan «Sýper Marıo: Galaktıka» fılmderi bar.
Buǵan deıin Gollıvýd juldyzdary Paramount pen Warner Bros kompanııalarynyń birigýine qarsy shyqqany habarlanǵandy.
