Maıkı Garsııa ataǵy jer jarǵan Mennı Pakıaomen aıqasatyn kúndi jarııa etti
NUR-SULTAN. QazAqparat – Tórt salmaq dıvızıonynyń burynǵy jeńimpazy, jartylaı orta salmaqtaǵy (66,7 kelige deıin) amerıkalyq Maıkı Garsııa (40-1, 30 KO) boks tarıhyndaǵy segiz salmaq dıvızıonyn baǵyndyrǵan jalǵyz jeńimpaz, aty ańyzǵa aınalǵan fılıppındik Mennı Pakıaomen (62-7-2, 39 KO) jekpe-jek ótkizýge keliskenin málimdedi, dep habarlaıdy QazAqparat Sports.kz-ke silteme jasap.
Amerıkalyqtyń aıtýynsha, jekpe-jek mamyr aıynda ótedi. Ol Djo Ankerge bul týraly: «Qazir biz kelisimdi túpkilikti aıaqtaýǵa jaqyn qaldyq. Ótetin kúni men orny týraly aldaǵy eki kúnde sheshemiz dep úmittenemiz. Barlyǵyn mamyr aıynda uıymdastyrýǵa tyrysýdamyz. Biz bul jekpe-jekke jetý úshin uzaq ýaqyt jumys istedik, kelissózder birneshe jyl boıy úzilistermen júrdi. Ótken jyly biz barlyǵyn naqtylap kelisken bolatynbyz, biraq sodan keıin pandemııa bastaldy. Endi, sońǵy aptalarda biz óte jaqynbyz. Biz kelisimsharttyń sońǵy satylaryndamyz», - dedi.
«Men óte qýanyshtymyn. Meniń oıymsha, bul jekpe-jek men úshin jáne meniń mansabym úshin, sondaı-aq jankúıerlerim úshin óte mańyzdy. Sharshy alańǵa ańyzǵa aınalǵan Pakıaomen shyǵý keremet», - deıdi Garsııa.
Jaqynda WBA «sýper chempıony» Pakıao boksshynyń belsendiliginiń tómendigine baılanysty «demalystaǵy chempıondar» qataryna aýystyryldy. Ol sporttyq mansabyn saıası mansappen biriktirýde. Ol – Fılıppınde senator, prezıdenttikke úmitker.
