Maıqaıyńda kirpish óndiretin kásiporyn ashylady
NUR-SULTAN. QazAqparat - «Maıqaıyńaltyn» AQ janynan kirpish óndiretin kásiporyn ashylady, dep habarlaıdy pavlodarnews.kz tilshisi. Bul týraly óńirlik kommýnıkatsııalar qyzmetinde ótken baspasóz jıynynda «Maıqaıyńaltyn» AQ bas dırektory Qýanysh Botın málim etti.
- Búginde kásiporyn iske kirisýge daıyn tur, - dedi Qýanysh Botın. – Ony salýǵa 92 mıllıon teńge qarjy jumsaldy. Qazirgi ýaqytta ruqsat qujattary daıyndalýda. Sertıfıkattaýdan ótip jatyrmyz. Kirpish óndiris qaldyqtarynan jasalady. Bizdegi kúl úıindisin paıdalanyp, tsement qospaqpyz. Kirpish sur tústi bolady.
Bas dırektor kásiporynnyń aıyna 30 myń kirpish óndirý qýattylyǵy bar ekenin atap ótti. Bir kirpishtiń quny shamamen 179 teńgeni quraıdy. - Kirpishti kádimgi qurylystarda, úı salýǵa paıdalanýǵa bolady, - dedi Qýanysh Botın.
– Asa iri kólemde óndirmeıtindikten, satý jaǵynan másele týyndamaýy tıis. Qazirdiń ózinde Maıqaıyń kentiniń turǵyndary kezekte tur. Ruqsat qaǵazdary kelgende jumys birden bastalady. Oǵan qosa, Maıqaıyń men Ekibastuzda júrip jatqan qurylys jumystary kóp. Sondyqtan kirpishimizge suranys bar.
Aıta keteıik, jyl boıy ónim shyǵaratyn kirpish kásiporynynda 12 jańa jumys oryny ashylady.
