«Maıqaıyń-V» ken rýdasyndaǵy qor 45 jylǵa jetkilikti
PAVLODAR. QazAqparat - «Maıqaıyńaltyn» AQ-nyń bir ǵana «Maıqaıyń-V» ken rýdasyndaǵy qor 45 jylǵa jetkilikti. Bul týraly búgin óńirlik kommýnıkatsııalar qyzmetinde ótken baspasóz máslıhatynda «Maıqaıyńaltyn» AQ-nyń bas dırektory Qýanysh Botın aıtty, dep habarlaıdy pavlodarnews.kz.
«2016 jyly mınıstrlikpen 25 jylǵa kelisimshart jasastyq», - dedi Qýanysh Botın. - Al qazirgi kezde jalǵyz ózi jumys istep turǵan №3 ıaǵnı, «Maıqaıyń-V» ken rýdasyndaǵy qor 45 jylǵa jetedi. Qalǵan №1 jáne №2 ken rýdalary jumysyn toqtatyp tur. Olar boıynsha suraq áli sheshilgen joq. 2017 jyly 325 myń tonna ken óndirdik. Oǵan qosa, qaldyqtardy qosqanda qaıta óńdeýge 387 myń ónim jiberildi. Kelisimshart boıynsha jylyna 330 myń tonna ken alý mindettelgen».
Sonymen qatar, Qýanysh Botın 2015 jyly bankrottyq jaǵdaıda turǵan kásiporynnyń qazir jaǵdaıy jaqsarǵanyn atap ótti. - 2015 jyly aktsıonerlerden 1 mln 600 myń dollar nesıe alyndy, - dedi Qýanysh Botın. - Ol qarjy fabrıka qurylǵylaryn qalpyna keltirýge jumsaldy. Qazir nesıeden basqa eshbir qaryzymyz joq. Jumys jospardaǵydaı júrip jatyr. Taza sýdy únemdegen soń, qarjy da únemdelýde. Únemdelgen qarjy nesıeni óteýge, kásiporyndy damytýǵa jáne jumyskerlerdiń jalaqysyn arttyrýǵa jumsalady. 2015 jyly jalaqy qorymyz 60 mln teńge bolsa, qazirgi kezde eki esege ósken. 110-115 mln teńgeni quraıdy".
Aıta ketelik, «Maıqaıyńaltyn» AQ 2017 jyly 2713 tonna altyn kontsentratyn jáne 20 857 tonna mys kontsentratyn óndirgen. Bul 2016 jylǵy kórsetkishten 50 paıyzǵa artyq. Kásiporynnyń ónimi tolyqtaı Qazaqstan jerinde qalady.
