Maıqaıyńdaǵy qutqarýshylar ólimi: sot kináli tulǵalarǵa úkim shyǵardy

PAVLODAR. KAZINFORM — Barlyq alty sottalýshy «Taý-ken nemese qurylys jumystaryn júrgizý kezinde qaýipsizdik qaǵıdalaryn buzý, abaısyzda eki nemese odan da kóp adamnyń ólimine ákep soqqan is-áreket» baby boıynsha aıyptalǵan edi.

Maıqaıyńdaǵy 4 qutqarýshynyń ólimi boıynsha qozǵalǵan qylmystyq iste aıyptalǵan tulǵalarǵa qatysty sot úkimi shyqty. Úkim Ekibastuz qalalyq sotynda jarııa etildi. 

Sýdıa 5 aıyptalýshyǵa bas bostandyǵynan aıyrý jazasyn taǵaıyndasa, taǵy bireýiniń bas bostandyǵyn shektedi.

Atap aıtqanda, «Maıqaıyńaltyn» AQ-nyń burynǵy bas dırektory 4 jylǵa bas bostandyǵynan aırylsa, bas dırektordyń burynǵy birinshi orynbasary men kenishtiń eks-dırektory 3,5 jylǵa sottaldy. 

Maıqaıyń jerasty kenishi dırektorynyń burynǵy orynbasary men bas ınjeneri 3 jylǵa túrmege qamalatyn boldy.

Sot aıyptalýshynyń eń sońǵysy — Maıqaıyń jerasty kenishiniń burynǵy dırektory 75 jasta ekenin eskere otyryp, 3 jylǵa bas bostandyǵyn shektedi.

— Sizderdiń kinálaryńyz sot tergeýinde uzaq ýaqyt boıy zerttelgen is boıynsha jınalǵan derekter jıyntyǵymen dáleldengen. Tergeý barysynda kýágerler, jábirlenýshiler, mamandar tyńdalyp, jaýap alyndy. Atalǵan dáleldemelerdiń, kýágerlerdiń, jábirlenýshilerdiń jáne qaıǵyly apattyń sebepterin anyqtaý deregi boıynsha qorytyndy júrgizgen mamannyń aıǵaqtarynyń jıyntyǵy sottalǵandardyń kinásin tolyq dáleldedi, rastady, anyqtady, — dep atap ótti Ekibastuz qalalyq sotynyń sýdıasy Aıjan Baıgonshekova.

Buǵan qosa, sot jábirlenýshilerdiń moraldyq zııandy óteý týraly talaptaryn qanaǵattandyrmady. Taraptar árbir eresek adamǵa 5 mıllıon teńgeden jáne balalarǵa 25 mıllıon teńgeden óndirip alýdy suraǵan edi. Muny sot sottalýshylar buryn «jábirlenýshilerge erikti túrde ótemaqy» jasaǵandyǵymen túsindirdi.

Eske sala keteıik, 2024 jylǵy 4 qańtarda altyn kenishinde ishinde adamdar bar avtobýs jer astyna túsip ketti. 

Apat saldarynan tórt qutqarýshy erlikpen qaza tapty. Olar — Aıdos Shaımerden, Oleg Tyshkevıch, Sarqyt Berdihan jáne Aıyp Tileýbergenov.

Apattyń alǵashqy kúni eki qutqarýshynyń múrdesi tabylǵan edi. 

Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatty. 

Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandandy. 

19 shildede Maıqaıyńda alty aıdan soń úshinshi qutqarýshynyń múrdesi tabylǵan edi. 

25 shilde kúni Maıqaıyńdaǵy oıyqqa túsip ketken avtobýs tabylyp, jerdiń astyna túsip ketken sońǵy adamnyń denesi joǵaryǵa shyǵaryldy. 

Keıin Elorda soty qutqarýshylardyń ólimine jumys berýshi tarap kináli dep tanydy. 

«Maıqaıyńaltyn» AQ-nyń altyn kenishinde tórt qutqarýshynyń ómirin qıǵan apatqa kináli tulǵalar retinde 6 adam ustaldy. 

Baıanaýyl aýdandyq soty Pavlodar oblystyq ónerkásiptik qaýipsizdik departamentiniń burynǵy qos qyzmetkerine jaza taǵaıyndaǵany týraly jazǵanbyz. 

Maıqaıyńdaǵy qaıǵyly oqıǵaǵa kináli tulǵalar 8 jylǵa bas bostandyǵynan aırylýy múmkin ekeni habarlandy. Baıanaýyl aýdandyq sotynda isti qaraýshy sýdıa zeınetke ketýine baılanysty sot protsesi Ekibastuz qalalyq sotyna aýystyryldy.

Sondaı-aq «Altynalmas AK» kompanııasy «Maıqaıyńaltyndy» tolyqtaı satyp aldy. 

Keıinirek Maıqaıyńdaǵy altyn kenishi naqty qunynan úsh ese arzanǵa satylyp ketkeni belgili boldy. 

Al bıylǵy qazan aıynda Maıqaıyń altyn kenishinde qaza tapqan tórt qutqarýshynyń rýhyna memorıaldyq keshen ashyldy. 

Buǵan deıin prokýror kináli tulǵalardy tórt jylǵa sottaýdy suraǵan edi.