Maıqaıyńdaǵy qaıǵyly oqıǵaǵa kináli tulǵalar 8 jylǵa bas bostandyǵynan aırylýy múmkin
PAVLODAR. KAZINFORM — Búgin Baıanaýyl aýdandyq sotynda Maıqaıyń altyn kenishinde 4 qutqarýshynyń ólimine sebepker bolǵan qaıǵyly oqıǵa boıynsha qylmystyq isti qaraý bastaldy.Atalǵan oqıǵa boıynsha sotta 6 adamǵa aıyp taǵylyp otyr.
«Maıqaıyńaltyn» AQ-nyń altyn kenishinde tórt qutqarýshynyń ómirin qıǵan apatqa kináli tulǵalar retinde 6 adam ustalǵany týraly buǵan deıin jazǵanbyz.
Sotta «Maıqaıyńaltyn» AQ-nyń burynǵy bas dırektory men onyń birinshi orynbasaryna, Maıqaıyń jerasty kenishiniń dırektory men onyń orynbasaryna, kásiporynnyń bas ınjeneri men bas marksheıderiniń mindetin atqarýshyǵa qatysty aıyp taǵyldy.
Tergeý qorytyndysyna súıensek, kásiporynda 2011 jyly ázirlengen joba boıynsha ken alynǵan jerasty keńistikterine beton quıý qarastyrylǵan. 2013 jyly tehnologııa protsesiniń kúrdeli bolýyna baılanysty ózgerister engizýge sheshim qabyldanyp, beton quıýdy keńistikterdi qulatý ádisine aýystyrǵan. Aıyptaýshynyń pikirinshe, atalǵan jobalardyń talaptaryn saqtamaý saldarynan atalǵan qaıǵyly jaǵdaıǵa ákep soqtyrǵan.
— AQ basshylyǵy erejelerdi buzyp, jerasty taý-ken jumystaryn 2011 jáne 2013 jyldardaǵy jobalardan aýytqı otyryp oryndaǵan. Ken alynǵan bos keńistikterdi baqylaý, sondaı-aq óndirilgen tazartý keńistiginiń bos jerlerin májbúrlep qulatý júrgizilmegen. Kásiporyn qyzmetkerleri úshin qaýipsiz eńbek jaǵdaıy qamtylmaǵan, sonyń ishinde keńistikterdiń ústingi jaǵynda ornalasqan, qulaýy yqtımal aımaqtardy qorshaý boıynsha sharalar qabyldanbaǵan jáne geomehanıkalyq (geotehnıkalyq) qyzmet uıymdastyrylmaǵan, — delingen aıyptaý aktinde.
Sottaǵy qylmystyq is QR Qylmystyq kodeksiniń 277-baby, 3-tarmaǵy — «Taý-ken nemese qurylys jumystaryn júrgizý kezinde qaýipsizdik qaǵıdalaryn buzý, abaısyzda eki nemese odan da kóp adamnyń ólimine ákep soqqan is-áreket» baby boıynsha qarastyrylyp otyr. Atalǵan bap boıynsha sot kináli tulǵany úsh jyldan segiz jylǵa deıingi merzimge bas bostandyǵynan aıyra alady.
Búgin sot otyrysynda eń áýeli jábirlenýshilerden, kýágerlerden, sarapshylardan jáne sońynan sottalýshylardan jaýap alýǵa sheshim qabyldandy.
Buǵan deıin Baıanaýyl aýdandyq soty Pavlodar oblystyq ónerkásiptik qaýipsizdik departamentiniń burynǵy qos qyzmetkerine jaza taǵaıyndaǵany týraly jazǵanbyz. Olardyń biri departamenttiń memlekettik qadaǵalaý bóliminiń basshysy, ekinshisi bólimniń bas mamany bolyp qyzmet etken. Laýazym ıeleri 2016 jyly «Maıqaıyńaltyn» kásipornynyń jerasty shahtasyn tekserý barysynda jiberilgen salǵyrttyq úshin jaýapty dep tanylǵan.
Eske sala keteıik, 2024 jylǵy 4 qańtarda Pavlodar oblysyndaǵy Maıqaıyń altyn kenishinde ishinde adamdar bar avtobýs jer astyna túsip ketti.
Apat bolǵan kúni oqıǵa ornynan eki qutqarýshynyń múrdesi tabyldy.
Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatty.
Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandandy.
19 shildede Maıqaıyńda alty aıdan soń úshinshi qutqarýshynyń múrdesi tabylǵan edi.
25 shilde kúni Maıqaıyńdaǵy oıyqqa túsip ketken avtobýs tabylyp, jerdiń astyna túsip ketken sońǵy adamnyń denesi joǵaryǵa shyǵaryldy.
Keıin Elorda soty qutqarýshylardyń ólimine jumys berýshi tarap kináli dep tanydy.
Opat bolǵan bir qutqarýshynyń otbasy jumys berýshiden 120 mln teńge óndirip aldy.
Keıin sot «Maıqaıyńaltyn» kenishinde qaza bolǵan qutqarýshynyń isi boıynsha moraldyq ótemaqyny tórt ese kemitti.
Apattan soń Maıqaıyńdaǵy «Shanhaı» shaǵyn aýdanynyń turǵyndary úılerimen qosa jer astyna túsip ketýden qorqatyndaryn aıtyp, dabyl qaqty.
Al 2024 jyldyń sońynda Pavlodar oblysynyń ákimi Maıqaıyńdaǵy apattyq úıler turǵyndaryna jańa baspana salynatynyn málim etti.
Baıanaýyl aýdaynynyń ákimdigi Maıqaıyńda apatty aımaqta turyp jatqan 273 adam qalaı kóshiritini týraly josparlarymen bólisti.
Sondaı-aq «Altynalmas AK» kompanııasy «Maıqaıyńaltyndy» tolyqtaı satyp aldy.
Óz kezeginde «Altynalmas» Maıqaıyń halqynyń ózekti máselelerin sheshýge yntaly ekenin habarlaǵan.