Maıqaıyńdaǵy apat: jerasty topyraǵynyń opyrylýy qutqarýshylarǵa qaýip tóndirip tur

ASTANA. KAZINFORM – Maıqaıyń altyn ken ornynda izdestirý jumystary jalǵasýda. Qazirgi jumys barysymen Tótenshe jaǵdaılar mınıstrligi Tótenshe jaǵdaılardy joıý departamenti bastyǵynyń orynbasary Jomart Asqarov aıtyp berdi. 

«Іzdeý jumystary jalǵasyp jatyr. Apat bolǵan kúni 2 adamnyń denesi tabyldy. Іzdestirý jumystary arnaıy apparattardyń kómegimen júrgizilýde, biz bar kúshimizdi salýdamyz. Sol sııaqty arnaıy uıym tartyldy», - dedi Jomart Asqarov Ortalyq kommýnıkatsııalar qyzmeti alańynda ótken baspasóz máslıhatynda. 

TJM ókiliniń aıtýynsha, Maıqaıyńdaǵy avtobýs apaty bolǵan jerde 139 maman tartyldy, odan bólek 40 tehnıka, 3 kınologııa qyzmeti jáne 2 pılotsyz ushý apparaty bar.

«Biz sondaı-aq sheteldik áriptestermen keńes júrgizdik. Sonymen qatar, jerasty topyraǵynyń qulaýy qutqarýshylarǵa qaýip tóndirip tur. Árıne biz barlyq parametrlerdi eskeremiz jáne sheshim aýa raıy jaǵdaılary men qutqarýshylardyń qaýipsizdigin eskere otyryp qabyldanady», - deıdi ol.

Eske sala keteıik, bıyl 4 qańtarda «Maıqaıyńaltyn» ken ornynda úlken oıyq mańynda topyraq opyrylyp, 4 adam mingen avtobýs jerdiń astyna túsip ketken bolatyn. 

Keıin oqıǵa ornynan eki adamnyń denesi tabyldy. 

Keshkisin tabylǵandardyń kim ekeni belgili boldy. 

Aıta keteıik, oqıǵa ornynda ıisshil ıtter jumys istep jatqany aıtyldy. Opyrylǵan jerde áli de topyraq syrǵyp túsip jatyr, opyrylý shekarasy turaqty emes. 

Baıanaýylda ken ornynda kóz jumǵan jáne iz-túzsiz ketkenderdiń otbasyna 4,5 mln teńgeden beriledi.

Odan bólek, qaza tapqandardy jerleý rásimine 2 mln teńgeden bólindi. 

Maıqaıyńdaǵy altyn kenishi týraly ne bilemiz? 

Altyn kenishindegi qaıǵyly jaǵdaıǵa baılanysty polıtsııa sotqa deıingi tergeýdi bastaǵan edi.