Maıqaıyńdaǵy apat týraly halyqaralyq sarapshylardyń pikiri qandaı
«PAVLODAR. KAZINFORM – «Maıqaıyńaltyn» AQ kenishinde izdestirý-qutqarý jumystary bastalǵaly beri QR TJM, Pavlodar oblysy TJD avarııalyq-qutqarý qyzmetteri qaýymdastyǵy halyqaralyq mamandarmen únemi keńesip otyrdy. Bul týraly QR TJM baspasóz qyzmeti málim etti.
QR TJM Tótenshe jaǵdaılardy joıý departamenti RF TJM avarııalyq-qutqarý jumystary basqarma bastyǵy osy ýaqytqa deıin Ózbekstan Respýblıkasy TJM Tótenshe jaǵdaılardy joıý basqarmasy bastyǵynyń mindetin atqarýshy, Qyrǵyz Respýblıkasy TJM Qutqarýshylardy daıarlaý ortalyǵynyń orynbasary, Belarýs Respýblıkasy TJM Avarııalyq-qutqarý jumystary basqarmasynyń bastyǵymen qolda bar tehnologııalar jáne uqsas izdeý-qutqarý operatsııalaryn júrgizý máselesi boıynsha tájirıbe almasý boıynsha konsýltatıvtik jumystar júrgizgen.
Tap osyndaı jumysty Pavlodar oblysynyń TJ departamenti de júrgizdi. RF TJM TJ joıý departamenti TJ halyqaralyq joıý basqarmasynyń bastyǵy, Belarýs Respýblıkasy TJM, RF TJM TJD avarııalyq-qutqarý jumystary basqarmasy bastyǵy, Belarýs Respýblıkasy TJM «ZÝBR» Respýblıkalyq arnaıy maqsattaǵy jasaǵynyń Mınsk ortalyǵynyń bastyǵy, Qyrǵyz Respýblıkasy TJ mınıstriniń eks orynbasarymen konsýltatsııalar ótkizildi.
Dál osy baǵyttaǵy jumysty Qazaqstan Respýblıkasynyń avarııalyq-qutqarý qyzmetteri qaýymdastyǵy da júrgizdi.
«Sheteldik seriktestermen — jetekshi kásibı avarııalyq-qutqarý (taý-ken qutqarý) qyzmetterimen jáne Ońtústik Afrıka, Reseı, Kanada seriktesterimen konsýltatsııalar ótkizildi. Halyqaralyq sarapshylar dál osy sıpattaǵy tótenshe jaǵdaılar tirkelmegenin atap ótti. Alaıda basqa erekshelikteri bar shahta apattary tirkeldi. Qazaqstandyq qutqarýshylardyń is-áreketterine sheteldik mamandardyń pikirleri oń» - delingen habarlamada.
Halyqaralyq sarapshylardyń pikirinshe, topyraqtyń qolda bar sıpattamalarynda qoldanýǵa bolatyn maksımaldy kúshter men quraldardy tarta otyryp, orasan zor kólemdi jumys júrgizilgen.
Joǵaryda atalǵan konsýltatıvtik keńeske qatysqan barlyq halyqaralyq sarapshylar jumysty odan ári jalǵastyrý qaýipti ekenin atap ótti. Óıtkeni obektidegi qutqarý jumystaryna topyraqtyń turaqsyz kúıi, shuńqyrdyń betkeılerindegi topyraqtyń sýsyldap tógilýi ári shuńqyrdyń astyndaǵy bos qýystar kedergi keltirip otyr.
Mamandardyń pikirinshe, bul jaǵdaı qutqarýshylardyń ómirine qaýip tóndiredi.
