Maıqaıyńdaǵy apat: qutqarýshylar oıyq túbine qosymsha tehnıka túsire almaı otyr
PAVLODAR. KAZINFORM - Qutqarýshylar óz ómirlerine táýekelge tige otyryp, Maıqaıyńdaǵy oıyq túbin qazý jumystaryn jalǵastyrýda. Shuńqyr shetindegi topyraq jynysy mezgil saıyn opyrylyp qulap jatyr.
Buǵan deıin kenishte gıdravlıkalyq balǵasy bar ekskavator shaǵyn kólemdi tasty usaqtap, onyń astynan avtobýstyń qosalqy dońǵalaǵy shyqqany týraly habarlaǵan edik. Búgin qutqarýshylar topyraq arasynan avtobýsqa tıesili taǵy birneshe usaq bólshekterdi qazyp shyǵardy. Shaǵyn ekskavatorlar avtobýs jatýy yqtımal jerdi asa saqtyqpen qazyp, jol salyp jatyr.
«Qutqarýshylardyń ómirine oıyq shetinen tómen qulap jatqan topyraqtar qaýip tóndirip tur. Sondyqtan shuńqyrdyń túbine bir nemese eki shaǵyn ekskvatordan artyq tehnıka túsirý múmkin emes. Al tehnıkalardyń baǵytyn syrtynan úılestirip turý úshin ol jerde birneshe maman ǵana bola alady. Ózge qutqarýshylar oıyqtaǵy protsesti udaıy baqylap, úıindi qulaı qalǵan jaǵdaıda tómendegilerdi tartyp shyǵýǵa daıyn otyrady. Barlyq tehnıka men adamdar arnaıy temir arqandarǵa jalǵanǵan», dep málimdedi óńirlik tótenshe jaǵdaılar departamentinen.
Qazirgi ýaqytta oıyq túbinde bir shómishti jáne bir gıdravlıkalyq balǵasy bar shaǵyn ekskavatorlar jumys istep jatyr. Eki býldozer bolat kermelerdi tartyp tursa, taǵy ekeýi ekskvatatorlardy saqtandyrý arqanyn ustap tur.
Tómendegi jumystarmen Pavlodar oblysy TJD shuǵyl qutqarý jasaǵynyń 15 qutqarýshysy, KÁAQQ ROSh Pavlodar fılıalynyń 15 qutqarýshysy, 2 taý-ken ınjeneri shuǵyldanýda.
Іzdestirý-qutqarý jumystaryna barlyǵy 138 adam, 40 birlik tehnıka, 3 kınologııalyq esep jáne 2 dron jumyldyryldy.
