Maıqaıyńdaǵy apat bolǵan altyn shahtasy qashan iske qosylady?

PAVLODAR. KAZINFORM – Altyn kenishin tekserip shyqqan arnaıy komıssııa 33 tarmaqtan turatyn kemshilikterdi kórsetip bergen. Ony qalpyna keltirgen kompanııa basshylyǵy endi taý-ken jumystarynyń josparyn usynǵan jaǵdaıda kenishtiń qaıta ashylýyna ruqsat berilýi múmkin.

Buǵan deıin habarlaǵanymyzdaı, kenishtegi apat pen onyń mańyndaǵy úılerdiń máselesin prokýratýra qurǵan tergeý toby zerdelep jatqanyna baılanysty shahtadaǵy ken qazý jumystary 4 qańtardan beri qańtarylyp qalǵan edi. 

Sol ýaqytta 185 jumysshy jalaqysynyń 50 paıyzy saqtalýymen májbúrli demalysqa jiberilgen. Keıin olardyń biraz bóligi kásiporynnyń ózge qurylymdyq bólimshelerinen jumys tapsa, keıbiri ózge kásiporyndarǵa aýysyp ketti.

Búgin qutqarýshylar shahta mańyndaǵy oıyqqa túsip qaza bolǵan sońǵy qutqarýshynyń denesin alyp shyqqany týraly habarlaǵan bolatynbyz. 

Endigi rette «Maıqaıyń-altyn» AQ-nyń qyzmetkerleri shahtanyń tezirek ashylýyn kútip otyr. Sebebi sońǵy jarty jyl boıy kásiporynnyń ken baıytý kombınaty qaldyq kenmen jumys istep kelgen.

Apat bolǵan altyn kenishi óz jumysyn qashan qaıta jalǵastyrady?

Bul saýaldy QR Tótenshe jaǵdaılar mınıstrligi Ónerkásiptik qaýipsizdik komıtetiniń Pavlodar oblysy boıynsha departamentiniń basshysy Almaz Oljaǵulovqa qoıdyq.

- «Maıqaıyń-altyn» AQ-ǵa qarasty altyn kenishi mańyndaǵy apat saldarynan ishinde tórt qutqarýshy bar avtobýs topyraq arasyna qulap ketti. Mine, arada jeti aıǵa jýyq ýaqyt ótkende sońǵy qutqarýshy qazyp alyndy. Marqum qutqarýshylardyń týystarynyń kóńilderi ornyna tústi dep oılaımyz. Al altyn shahtasynyń qaıtadan iske qosylýy týraly másele jaqyn kúnderi belgili bolyp qalady. Bul úshin eń áýeli ken óndirýshi kásiporyn bizdiń departamentke taý-ken jumystarynyń josparyn usynýy kerek. Ony respýblıkalyq komıtetimiz quptaǵan jaǵdaıda shahta óz jumysyn jalǵastyra alady. Buǵan deıin arnaıy komıssııa jer astyndaǵy shahtanyń jaı-kúıin zerdelep, 33 tarmaqtan turatyn kemshilikti joıý týraly uıǵarymdy aktsıonerlik qoǵam basshylyǵyna jóneltken. Bul olqylyqtardyń orny toltyrylyp, kenish óz jumysyn bastaýǵa daıyndalyp jatqany anyq,-dep jaýap berdi Kazinform tilshisiniń saýalyna Almaz Oljaǵulov.

Eske sala keteıik, Astana soty altyn kenishindegi qaıǵyly oqıǵa 100% «Maıqaıyń-altyn» AQ-nyń kinásinen bolǵan degen sheshim shyǵardy.

Al Eńbek jáne áleýmettik qorǵaý komıtetiniń tóraǵasy Tólegen Ospanqulov Maıqaıyńdaǵy apat boıynsha 21 adam kináli dep tanylýy múmkin ekenin aıtqan.