Maıqaıyńdaǵy apat: avtobýstyń shanaǵy men qutqarýshylardyń sómkesi tabyldy
ASTANA. KAZINFORM – Oıyq túbine túsirilgen shaǵyn ekskavator jer qazý jumystary barysynda avtobýstyń shanaq bóligin tapty. Sondaı-aq topyraq arasynan qutqarýshylardyń jolsapar jýrnaly men jumys qujattary salynǵan sómke shyqqan.
Oqıǵa ornynda qurylǵan jedel shtab ókilderi habarlaǵandaı, búgin saǵat 14.45-te «Maıqaıyńaltyn» AQ aýmaǵyndaǵy opyrylǵan shuńqyrdyń túbine shaǵyn kólemdi ekskavator túsirildi.
Tehnıka shuńqyrdyń búıir qabyrǵalary qulaý qaýpin eskere otyryp, jer qazý jumystaryn asa saqtyqpen júrgizgen.
- Jumystardy júrgizý kezinde ishinde jumys qujattary men jolsapar jýrnaly bar qutqarýshylar sómkesi, sondaı-aq, memlekettik tirkeý nómiri bar avtobýstyń shanaq bóligi tabyldy. Іzdestirý áli de jalǵasýda. Avtobýstyń boljamdy ornalasqan jerine deıingi topyraq qazyp qazyp alynǵan soń, ekskavatordyń jumysy aıaqtalady. Mamandar jer astynda jatqan avtobýsty joǵary kóterý jumystaryn bastaıdy. Biz bul jumystardy búgin-erteń aıaqtaımyz dep úmittenemiz,-delingen Pavlodar oblysy ákiminiń baspasóz qyzmeti taratqan aqparatta.
Osy ýaqytqa deıin barlyǵy 200 myń tonnadan astam topyraq pen taý jynystary shyǵarylǵan. Іzdestirý jumystaryna 141 adam, 50 birlik tehnıka, 1 kınologııalyq top jáne 2 dron jumyldyrylǵan.
