Maıqaıyńda alty aıdan soń eki qutqarýshynyń biriniń múrdesi tabyldy
PAVLODAR. KAZINFORM – Maıqaıyńdaǵy opyrylyp túsken kenish túbinde alty jarym aı ýaqyt jatqan eki qutqarýshynyń biriniń denesi tabyldy. Týystary onyń Aıdos Shaımerdenniń múrdesi ekenin naqtylady.
Aıta keteıik, A.Shaımerden – oıyq astynda jatqan eki azamattyń biri bolǵan edi. Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Pavlodar fılıalynda jedel aldyn alý jumystary jónindegi vzvod komandıriniń orynbasary bolyp qyzmet atqarǵan.
Maıqaıyńdaǵy oıyqtan bir qutqarýshynyń máıiti tabylǵany týraly aqparatty Baıanaýyl aýdanynyń ákimi Ardaq Kisentaev rastady.
«Jańa ǵana Maıqaıyń kentindegi shahta basynda boldyq. Kenishtegi avtobýs opyrylyp túsip ketken jerdi qazyp jatqan «Maıqaıyńaltyn» AQ qyzmetkerleri eki qutqarýshynyń biriniń múrdesin topyraq arasynan alyp shyqty. Ol jerde atalǵan kásiporynnyń ókilderinen bólek, polıtseıler, tótenshe jaǵdaılar qyzmetkerleri de júr. Aldyn ala boljam boıynsha, tabylǵan múrde Aıdos Shaımardendiki. Naqtysy arnaıy saraptamadan soń belgili bolady. Jaǵdaıdyń, qazý jumystarynyń ári qaraıǵy reti qalaı bolatynyn aıta almaımyn. Ony altyn kenishiniń basshylyǵy sheshedi», - dedi Ardaq Kisentaev.
Al marqum Aıdos Shaımerdenniń jary Nursulý Shaımerden tabylǵan máıittiń óziniń joldasynyń denesi ekenin rastaıtynyn jetkizdi.
Eske sala keteıik, Pavlodar oblysyndaǵy maıqaıyń altyn kenishinde ishinde adamdar bar avtobýs bıylǵy 4 qańtar kúni jer astyna túsip ketti.
Keıin oqıǵa ornynan eki adamnyń denesi tabyldy.
Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatqan bolatyn.
Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandanǵany týraly habarlaǵanbyz.
Marqum Aıdostyń jary Nursulý Shaımerden buǵan deıin kúıeýiniń tiri ekenine eshqandaı úmiti joq ekenin, qutqarýshylar múrdesin qazyp berse, arýlap jer qoınyna tapsyrý sońǵy tilegi ekenin aıtqan edi.
«Bizdiń otbasymyz bul kúndi uzaq ýaqyttan beri taǵatsyzdana kútken edik. Qutqarýshylar jaqyn adamdarymyzdy taýyp alatynyna senimdimiz. Kásiporyn basshylyǵy aıtqandaı, eń áýeli oıyq mańynda ken jynystaryn qazý jumystary júrgiziledi. Sodan soń kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Pavlodar fılıalynyń qutqarýshylary iske kirisedi. Qazirgi ýaqytta jumystar táýlik boıy júrgizilip jatyr. Bas dırektor Qaırolla Júrsinbaev jer astynda jatqan qos azamatty taýyp alǵan soń ǵana shahta iske qosylatynyn jetkizdi», - degen edi buǵan deıin Nursulý Shaımerden Kazinform agenttininiń tilshisine bergen suhbatynda.
Al ekinshi qutqarýshy – jedel avtokólik júrgizýshisi Aıyp Tileýbergenovti izdeý jumystary aldaǵy ýaqytta jalǵasady.
