Maıqaıyńdaǵy altyn kenishi naqty qunynan úsh ese arzanǵa satylyp ketken
PAVLODAR. KAZINFORM — «Altynalmas AK» AQ kompanııasy «Maıqaıyńaltyn» kásipornyn óz qunynan úsh ese arzanǵa satyp alǵan. Bul týraly kompanııanyń 2024 jylǵy qarjylyq jáne aýdıtorlyq esebinde kórsetilgen.
Tórt qutqarýshynyń ómirin jalmaǵan «Maıqaıyńaltyn» AQ-nyń barlyq kapıtaldary, sonyń ishinde altyn kenishi men kombınaty, bıylǵy sáýir aıynda tolyqtaı «Altynalmas AK» AQ-nyń qaraýyna ótkeni týraly jazǵanbyz. «Rense Enterprises Limited» kompanııasyna tıesili bolǵan jarǵylyq kapıtal 100% «Altynalmasqa» satyldy.
Belgili bolǵandaı, «Maıqaıyńaltyn» jańa ıesine 5,8 mlrd teńgege satylǵan. Kase.kz — Qazaqstan qor bırjasynda «Altynalmas AK» AQ 2024 jylǵa shoǵyrlandyrylǵan qarjylyq eseptiligi jáne aýdıtorlyq esebi jarııalandy. Esepte kórsetilgendeı, maıqaıyńdyq kásiporyndy kompanııa 5 mlrd 827 mln teńgege satyp alǵan.
— 2025 jyldyń 2 sáýirinde Top ken oryndary portfelin keńeıtý strategııasyn júzege asyrý aıasynda «Maıqaıyńaltyn» AQ altyn óndirý kompanııasyn satyp aldy. Satyp alý kezinde belgilengen ádil quny — 5 mlrd 827 mln 677 myń teńge, - dep kórsetilgen qarjylyq esepte.
Bul somaǵa altyn kenishi úshin tólem jáne kásiporynnyń buǵan deıingi kelisimsharttyq qarym-qatynastaryn retteý kirgen.
Al «Maıqaıyńaltynnyń» aktıvteri jalpy somasy 24,5 mlrd teńge dep baǵalanǵan. Sondaı-aq kompanııanyń mindettemeleri 6,6 mlrd teńge dep kórsetilgen. Osylaısha «Altynalmas» kenishti negizgi qunynan 3 ese arzanǵa satyp alǵany málim bolyp otyr. Sátti satyp alýdan jańa ıesi 11,8 mlrd teńgeden astam paıda kórgen.
Jalpy 2024 jyly «Altynalmas» kompanııasynyń jyldyq tabysy 175,6 mlrd teńge bolǵany kórsetilgen. Bul 2023 jylmen salystyrǵanda 120,5%-ǵa kóp. «Altynalmastyń» sheshýshi aktsıonerleri — nıderlandııalyq Gouden Reserves B.V. toby (67,5% úleske ıe) men qazaqstandyq olıgarh Vladımır Djýmanbaev (22,5%).
Eske sala keteıik, 2024 jylǵy 4 qańtarda Pavlodar oblysyndaǵy Maıqaıyń altyn kenishinde ishinde adamdar bar avtobýs jer astyna túsip ketti.
Apat bolǵan kúni oqıǵa ornynan eki qutqarýshynyń múrdesi tabyldy.
Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatty.
Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandandy.
19 shildede Maıqaıyńda alty aıdan soń úshinshi qutqarýshynyń múrdesi tabylǵan edi.
25 shilde kúni Maıqaıyńdaǵy oıyqqa túsip ketken avtobýs tabylyp, jerdiń astyna túsip ketken sońǵy adamnyń denesi joǵaryǵa shyǵaryldy.
Keıin Elorda soty qutqarýshylardyń ólimine jumys berýshi tarap kináli dep tanydy.
Opat bolǵan bir qutqarýshynyń otbasy jumys berýshiden 120 mln teńge óndirip aldy.
Keıin sot «Maıqaıyńaltyn» kenishinde qaza bolǵan qutqarýshynyń isi boıynsha moraldyq ótemaqyny tórt ese kemitti.
Apattan soń Maıqaıyńdaǵy «Shanhaı» shaǵyn aýdanynyń turǵyndary úılerimen qosa jer astyna túsip ketýden qorqatyndaryn aıtyp, dabyl qaqty.
Al 2024 jyldyń sońynda Pavlodar oblysynyń ákimi Maıqaıyńdaǵy apattyq úıler turǵyndaryna jańa baspana salynatynyn málim etti.
Baıanaýyl aýdaynynyń ákimdigi Maıqaıyńda apatty aımaqta turyp jatqan 273 adam qalaı kóshiritini týraly josparlarymen bólisti.
Sondaı-aq «Altynalmas AK» kompanııasy «Maıqaıyńaltyndy» tolyqtaı satyp aldy.
Óz kezeginde «Altynalmas» Maıqaıyń halqynyń ózekti máselelerin sheshýge yntaly ekenin habarlaǵan.