Maıqaıyńdaǵy altyn kenishi arada 9 aı ótkende qaıtadan iske qosyldy

PAVLODAR. KAZINFORM - «Maıqaıyńaltyn» AQ-da tórt qutqarýshynyń ómirin jalmaǵan apattan keıin jumysy toqtap turǵan kenish qaıtadan ashyldy. Búginde onda jerasty jarylystary uıymdastyrylyp, altyn kombınatyna shıkizat tolassyz jetkizilip jatyr.

- «Maıqaıyńaltyn» AQ-ǵa qarasty altyn kenishi qazan aıynan beri jumysyn tolyqqandy bastap ketti. Búginge deıin birneshe jarylys jumystaryn júrgizip, qazir kendi turaqty óndirýge kóshtik. Kenishten shyǵyp jatqan ken jynystary ken baıytý kombınatyn turaqty qamtamasyz etýge jetkilikti. Kombınat janynda jyldar boıy úıilip qalǵan óńdeýden keıingi qaldyq ta kádege jaratylyp jatyr. Shıkizatty syrttan tasýǵa eshqandaı sebep joq, qazir óndiris tsıkly jolǵa qoıyla bastady-dep habarlady Kazinform tilshisine «Maıqaıyńaltyn» AQ bas dırektory Qaırolla Júrsinbaev.

Bıyl jyl basynda kenishte bolǵan qaıǵyly oqıǵadan soń altyn shahtasynyń kenshileri májbúrli demalysqa jiberilgeni málim. Kásiporyn basshysynyń aıtýynsha, olardyń biraz bóligi burynǵy jumys oryndaryna qaıtyp oralǵan. Al basqa jumystarǵa aýysyp ketkenderdiń ornyna jańadan kenshiler alynǵan.

«Kenishte qansha qyzmetker eńbek etetindigi týraly aqparat ázirshe joq. Deıturǵanmen naqty shtat sany qazan aıynyń sońynda belgili bolyp qalady»,-dedi bas dırektory.

Eske sala keteıik, 4 qańtarda Pavlodar oblysyndaǵy Maıqaıyń altyn kenishinde ishinde adamdar bar avtobýs jer astyna túsip ketti. 

Apat bolǵan kúni oqıǵa ornynan eki qutqarýshynyń múrdesi tabyldy. 

Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatty. 

Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandandy. 

19 shildede Maıqaıyńda alty aıdan soń úshinshi qutqarýshynyń múrdesi tabylǵan edi. 

25 shilde kúni Maıqaıyńdaǵy oıyqqa túsip ketken avtobýs tabylyp, jerdiń astyna túsip ketken sońǵy adamnyń denesi joǵaryǵa shyǵaryldy.

Keıin Elorda soty qutqarýshylardyń ólimine jumys berýshi tarap kináli dep tanydy.

Opat bolǵan bir qutqarýshynyń otbasy jumys berýshiden 120 mln teńge óndirip aldy.

Qyrkúıek aıynda kenishtegi apatqa kináli retinde 6 adam qamaýǵa alynǵany týraly jazǵan edik.

Kúdiktiler keıin úıqamaqqa jiberildi.