Maıqaıyńda tabylmaı jatqan qutqarýshynyń otbasyna 5 bólmeli páterdiń kilti berildi
PAVLODAR. KAZINFORM - Pavlodar oblysynyń ákimi Asaıyn Baıhanov Maıqaıyń kentine arnaıy baryp, kenishtegi oıyqqa avtobýspen birge túsip ketken qutqarýshy A.Shaımerdenniń otbasyna bes bólmeli páterdiń kiltin tabystady.
Aıdos Shaımerden – oıyq astynda jatqan eki azamattyń biri.
Ol kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Pavlodar fılıalynda jedel aldyn alý jumystary jónindegi vzvod komandıriniń orynbasary bolyp qyzmet atqarǵan. Azamattyń sońynda jary Nursulý Shaımerden men 5 balasy qalyp otyr.
Pavlodar oblysy ákiminiń baspasóz qyzmeti atalǵan otbasyǵa bes bólmeli páterdiń kilti tabys etilgenin, páter Pavlodar qalasynda ornalasqanyn rastady.
Eske sala keteıik, 15 mamyrda Maıqaıyń altyn kenishinde qos qutqarýshyny izdeý jumystary qaıta jandandy.
Eńbek jáne halyqty áleýmettik qorǵaý mınıstrligi Eńbek jáne áleýmettik qorǵaý komıtetiniń tóraǵasy Tólegen Ospanqulov Maıqaıyńdaǵy apat boıynsha 21 adam kináli dep tanylýy múmkin ekenin málim etti.
