Maıqaıyńda tabylǵan múrdeler: kúdiktiler psıhıatrııalyq dıspanserde em qabyldap jatyr
PAVLODAR. KAZINFORM — Polıtsııa atalǵan qylmystyq is boıynsha eki áıeldiń kúdikti retinde tanylǵanyn habarlady. Qazirgi ýaqytta olar psıhonevrologııalyq dıspanserge ornalastyrylǵan.
Pavlodar oblystyq polıtsııa departamenti Maıqaıyń kentindegi jantúrshigerlik oqıǵa boıynsha qylmystyq is «Ólgenderdiń máıitterin jáne olar jerlengen jerlerdi qorlaý» jáne «Alaıaqtyq» derekteri boıynsha qozǵalǵanyn málimdedi. Oqıǵanyń mán-jaıy men sebepteri tergeý barysynda anyqtalmaqshy.
Buǵan qosa qazirgi ýaqytta sot-psıhologııalyq-psıhıatrııalyq saraptama júrgizilýde, onyń nátıjesi boıynsha túpkilikti protsessýaldyq sheshim qabyldanady. Kúdiktiler qatarynda eki áıel bar.
— Eki áıel de mamandandyrylǵan psıhıatrııalyq dıspanserge ornalastyrylyp, em qabyldap jatyr. Al qyz bala tekserýden ótken soń Ekibastuz qalasyndaǵy balalarǵa arnalǵan memlekettik mekemege jiberildi. Tergeý jalǵasady, — dep habarlady Pavlodar oblysty polıtsııa departamentiniń ókilderi.
Eske sala keteıik, aqpan aıynyń ortasynda Pavlodar oblysy Baıanaýyl aýdanynyń Maıqaıyń kentindegi jer úıden eki adamnyń múrdesi tabyldy. Qaıtys bolǵandar qyzy men ákesi ekeni anyqtalǵan. Belgili bolǵandaı, marqumdardyń múrdesi úıde uzaq ýaqyt jatyp qalǵan. Al úıde osy ýaqytqa deıin qaıtys bolǵan er adamnyń zaıyby jáne marqum áıeldiń kishkentaı balasy turyp kelgen.
