Maıqaıyńda kóz jumǵan jáne iz-túzsiz ketkender jaıly jańa derek shyqty
Qutqarýshylar áli kúnge taba almaı jatqan eki azamattyń biri kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Pavlodar fılıalynda vzvod komandıriniń orynbasary bolyp eńbek etken, dep habarlaıdy Kazinform.
4 qańtar kúni Maıqaıyńdaǵy altyn kenishiniń eski shahta aýmaǵynda paıda bolǵan oıyqqa túsip ketken avtobýsta 4 adamnyń bolǵany týraly habarlaǵan edik. Olardyń barlyǵy – kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Pavlodar fılıalynyń qyzmetkerleri. Qutqarý qyzmetiniń resmı saıtynda kórsetilgendeı, Pavlodarlyq fılıalda shamamen 209 adam eńbek etse, onyń 36-sy «Maıqaıyńaltyn» AQ-nyń óndiristik bazalaryna jaýapty bolǵan. Budan bólek kásibılendirilgen mekeme Ekibastuzdaǵy jáne Bozshakóldegi ken oryndaryna qyzmet kórsetedi.
Qutqarýshylar ekinshi táýlik izdep jatqan avtobýs ishinde atalǵan qutqarý qyzmetiniń jedel aldyn alý jumystary jónindegi vzvod komandıriniń orynbasary Aıdos Shaımerden (36 jasta) men jedel avtokólik júrgizýshisi Aıyp Tileýbergenov (55 jasta) bar. Bul aqparatty Maıqaıyń kentiniń ákimdigi rastap otyr. A.Shaımerden – 5 balanyń ákesi, jubaıy ekeýi 4 er, 1 qyz balany tárbıelep ósirgen. Al 12 qańtar kúni 56 jasqa tolatyn avtobýs júrgizýshisi A.Tileýbergenovtiń otbasynda múgedek qyz bala bar dep habarlandy. Eki azamat ta Maıqaıyń kentiniń turǵyndary.
Buǵan deıin habarlaǵanymyzdaı, 4 qańtar kúni qutqarýshylar topyraq arasynan 2 azamattyń múrdesin alyp shyqqan. Olar – Sarqyt Berdiqan (1999 jylǵy) jáne Tyshkevıch Oleg Leonıdovıch (1970 jylǵy).
Marqum Berdiqan Sarqyt – Maıqaıyń kentiniń turǵyny, marqumnyń sońynda kelinshegi men eki uly qaldy. Onyń birine 1 jas 10 aı tolsa, ekinshi uly ótken jyldyń qazan aıynda ǵana dúnıege kelgen. Berdiqan eńbek uıymynda qutqarýshy laýazymynda qyzmet ketken.
Al Ekibastuz qalasynyń turǵyny bolǵan Oleg Leonıdovıch jalǵyzbasty jan, áıeli qaıtys bolǵan. Kámelet jasyna tolyp ketken bir ul, bir qyzy bar. Ol da eńbek ujymynda qutqarýshy bolyp istegen.
Maıqaıyń altyn kenishiniń oıyǵyna túsip ketken avtobýs pen ondaǵy eki adamdy izdestirý jumystary kúni-túni júrip jatyr. Pavlodar oblysynyń ákimi, jedel shtabtyń tóraǵasy Asaıyn Baıhanov búgin habarlaǵandaı, shahta ústinde paıda bolǵan úlken shuńqyrdyń túbine aýyr tehnıkalar túse bastady.
Eske sala keteıik, 4 qańtar kúni «Maıqaıyńaltyn» ken ornynda úlken oıyq mańyndaǵy topyraq opyrylyp, 4 adam mingen avtobýs jerdiń astyna túsip ketken bolatyn.
Keıin oqıǵa ornynan eki adamnyń denesi tabyldy.
Keshkisin tabylǵandardyń kim ekeni belgili boldy.
Oqıǵa ornynda ıisshil ıtter jumys istep jatyr. Opyrylǵan jerde áli de topyraq syrǵyp túsip jatyr, opyrylý shekarasy turaqty emes.
Baıanaýylda ken ornynda kóz jumǵan jáne iz-túzsiz ketkenderdiń otbasyna 4,5 mln teńgeden beriledi.
Altyn kenishindegi apat: qaza tapqandardy jerleý rásimine 2 mln teńgeden bólindi.
Maıqaıyńdaǵy altyn kenishi týraly ne bilemiz?
Altyn kenishindegi qaıǵyly jaǵdaıǵa baılanysty polıtsııa sotqa deıingi tergeýdi bastady.
