Maıqaıyńda komıssııa qurylyp jatyr: Avtobýs qulaǵan oıyqtaǵy izdestirý jumysy odan ári jalǵasa ma

PAVLODAR. KAZINFORM - Arnaıy skaner oıyq túbindegi taý jynystarynyń qurylymy ózgergenin ári jumsaryp bara jatqanyn anyqtady. Ázirshe izdeý-qutqarý jumystary turaqty túrde jalǵasýda.

Óńirlik tótenshe jaǵdaılar departamentinen habarlaǵandaı, búgin mamandar geologııalyq radarmen oıyq túbin kezekti ret skanerlegen.

«Geologııalyq skanerden alynǵan málimetterdi zerdeleı kelgende, shuńqyr túbindegi taý jynystarynyń qurylymy ózgerip, bosańsı bastaǵany anyqtaldy. Nysannyń janynda jáne astynda qýystar men bos keńistikter bar. Kez kelgen sátte taý jynystary tómen opyrylyp túsip ketýi múmkin. Qazirgi kúni oıyqtyń barlyq perımetrin tekserip shyǵýǵa arnalǵan komıssııa qurylyp jatyr. Komıssııa taý massasyn tolyqtaı barlap, izdestirý jumystaryn ári qaraı jalǵastyrý kerek pe, joq pa, sony anyqtaıdy» dep málimdedi tótenshe jaǵdaılar departamentiniń baspasóz qyzmeti.

Búgin apat ornynda ekskvator men mamandar ádettegideı rejimde jumys istedi.

Eske sala keteıik, keshe jumystar júrip jatqan jerde tereń oıyq paıda bolyp, qutqarýshylardyń jumysy shuǵyl toqtatyldy. 

Arada kóp uzamaı qutqarý sharalary qaıta jalǵasty.