Maıqaıyńda jeti aı buryn jerdiń astyna túsip ketken sońǵy adamnyń denesi tabyldy
PAVLODAR. KAZINFORM — 25 shildede qutqarýshylar Maıqaıyń kenishinde jerdiń astyna túsip ketken tórtinshi adamdy tapty.
Avtobýstyń bólshekterin shyǵarý úshin TJD qutqarýshylary jáne shahta qyzmetkerleri opyrylǵan topyraq pen tastyń qulaý qaýpine qaramastan jumys istedi.
Onyń barysynda saǵat 16:05–te ekskavator arqyly topyraqty bógeý kezinde 75 metr tereńdikten mashınıstiń denesi tabylyp, saraptamaǵa jiberildi.
Іzdeý-qutqarý jumystary táýlik boıy jáne aıtarlyqtaı úlken qaýippen júrgizilgenin atap ótken jón.
Taý jynystary men topyraq únemi syrǵyp túsip jatty. Jumysqa ártúrli qyzmetterdiń 200-den astam qyzmetkeri tartyldy.
180 myńnan astam tonna taý massasy shyǵaryldy.
«Bul shaǵyn ekskavatorǵa avtobýstyń ornalasqan jerine túsip, jumysty bastaýǵa múmkindik berdi. Shuńqyrdyń shetinen topyraq pen taý jynystarynyń qozǵalysy men qulaýyn baqylaý júrgizildi. Qutqarýshylar shuńqyrdyń túbindegi ekskavatorlar men basqa mamandardyń jumysyn saqtandyrý men qaýipsizdikti únemi qamtamasyz etip otyrdy. Avarııalyq-qutqarý erejesi men qaýipsizdik sharalaryn saqtaı otyryp, janarmaı, tamaq, marksheıder — mamandardy túsirý, sondaı-aq tabylǵan zattar kóterildi» deıdi TJM baspasóz qyzmetinen.
Mamandar topyraqty metall detektorymen, geoskanermen jáne magnıtometrmen únemi skanerlep otyrdy.
Sonymen qatar oqıǵa ornynda kınologtar jumys istedi.
Aıta keteıik, Pavlodar oblysynyń ákisi Asaıyn Baıhanov Maıqaıyńdaǵy oıyqtan tabylǵan tórtinshi qutqarýshy Aıyp Tileýbergenovtiń otbasyna kóńil aıtty.
«4 qańtar kúni Maıqaıyń kenishiniń janynda jumys istemeıtin shahtanyń tazartý keńistigine «KÁAQQ ROSh» JShS qutqarýshylary otyrǵan avtobýs qulap ketken bolatyn. Osy qaıǵyly oqıǵadan keıin 7 aı ýaqyt ótti. Osy ýaqyt ishinde qaza bolǵan jandardyń týystary sııaqty biz de joǵalǵan qutqarýshylardy tabamyz degen úmitte boldyq. Búgin saǵat 16.20-da sońǵy qutqarýshy-júrgizýshi Aıyp Tileýbergenovtiń denesi tabyldy. Marqumnyń týystary men jaqyndaryna kóńil aıtamyn. Marqumǵa ıman baılyǵyn bersin»,-dep jazdy óńir basshysy Asaıyn Baıhanov Instagram paraqshasynda.
Oblys ákimi joǵalǵan adamdardy tabý úshin kúndiz-túni jumys istegen barlyq janǵa alǵys aıtatynyn jetkizdi.
Eske sala keteıik, 4 qańtarda Pavlodar oblysyndaǵy Maıqaıyń altyn kenishinde ishinde adamdar bar avtobýs jer astyna túsip ketti.
Oqıǵa ornynan eki adamnyń denesi tabyldy.
Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatty.
Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandandy.
19 shildede Maıqaıyńda alty aıdan soń úshinshi qutqarýshynyń múrdesi tabylǵan edi. Marqum Aıdos Shaımerdenniń denesi 70 metr tereńdikten qazyp alynǵan.
Al búgin oıyqqa túsip ketken avtobýs joǵary shyǵaryldy.
