«Maıqaıyńaltynǵa» jańa basshy taǵaıyndaldy
PAVLODAR. KAZINFORM - Pavlodar oblysyndaǵy «Maıqaıyńaltyn» AQ- nyń bas dırektory bolyp Danıal Nábıev taǵaıyndaldy. Ol buǵan deıin atalǵan kompanııada basshynyń birinshi orynbasary qyzmetinde bolǵan.
«Maıqaıyńaltynnyń» eńbek ujymyna jańa basshy tanystyryldy. Altyn kásipornynyń jańa ıesi - «Altynalmas» AQ basshylyǵy Danıal Nábıevtiń kandıdatýrasyn quptap, bas dırektorlyqqa bekitken. D. Nábıevtiń basqarýshylyq tájirıbesi mol, Qazaq-Brıtan ýnıversıtetiniń túlegi.
Qazirgi ýaqytta eńbek uıymy birqatar jańa baǵyttardy josparlap qoıǵan. Paıdalaný merzimin uzartý jáne óndiris kólemin arttyrý maqsatynda kompanııa qazirdiń ózinde qatty paıdaly qazbalardy barlaý úshin bes lıtsenzııa alǵan. Perspektıvti baǵyttardyń biri - Baıanaýyldaǵy «Alpys» ken orny. Onda geologııalyq barlaý jumystary júrgiziletin bolady. Ken ornynyń ıgerilýi bastalǵan ýaqyttan beri jınaqtalǵan tarıhı qaldyqtardy óńdeıtin jańa fabrıka salý kózdelip otyr. «Altynalmas» kompanııasy damý, óndiris kólemin arttyrýdy ǵana emes, kásiporyndaǵy eńbek ahýalyn jaqsartyp, áleýmettik jaǵdaıdy durystaýǵa kóńil aýdarmaqshy.
Buǵan deıin «Altynalmas AK» kompanııasy «Maıqaıyńaltyndy» satyp alý protsesin aıaqtaǵany týraly jazǵan edik.
Eske sala keteıik, 2024 jylǵy 4 qańtarda Pavlodar oblysyndaǵy Maıqaıyń altyn kenishinde ishinde adamdar bar avtobýs jer astyna túsip ketti.
Apat bolǵan kúni oqıǵa ornynan eki qutqarýshynyń múrdesi tabyldy.
Byltyrǵy 19 shildede Maıqaıyńda alty aıdan soń úshinshi qutqarýshynyń múrdesi tabylǵan edi.
Al 25 shilde kúni Maıqaıyńdaǵy oıyqqa túsip ketken avtobýs tabylyp, jerdiń astyna túsip ketken sońǵy adamnyń denesi joǵaryǵa shyǵaryldy.
Keıin Elorda soty qutqarýshylardyń ólimine jumys berýshi tarap kináli dep tanydy.
Qyrkúıek aıynda kenishtegi apatqa kináli retinde 6 adam qamaýǵa alynǵany týraly jazǵan edik.
Kúdiktiler keıin úıqamaqqa jiberildi.
Keıin sot «Maıqaıyńaltyn» kenishinde qaza bolǵan qutqarýshynyń isi boıynsha moraldyq ótemaqyny tórt ese kemitti.
Al 2024 jyldyń sońynda Pavlodar oblysynyń ákimi Maıqaıyńdaǵy apattyq úıler turǵyndaryna jańa baspana salynatynyn málim etti.
Bıylǵy aqpan aıynda Maıqaıyń kenishindegi apatqa kináli tulǵalardyń alǵashqylaryna úkim shyǵaryldy.
Al jaqynda Pavlodar oblysynyń bıligi Maıqaıyńda apatty aımaqta turyp jatqan 273 adam qalaı kóshiretini týraly aldyn ala josparlaryn jarııa etti.