Maıqaıyńaltyndaǵy apat: prokýror kináli tulǵalardy tórt jylǵa sottaýdy surady
PAVLODAR. KAZINFORM - Ekibastuz qalalyq sotynda ótip jatqan «Maıqaıyńaltyn» kenishindegi qaıǵyly jaǵdaı boıynsha sot protsesi jaryssózge ulasty. Prokýror kináli tulǵalardyń árqaısysyna 4 jyldan jaza taǵaıyndaýdy surap otyr.
Memlekettik aıyptaýshy sottalýshylardyń QR Qylmystyq kodeksiniń 277-baby, 3-tarmaǵy — «Taý-ken nemese qurylys jumystaryn júrgizý kezinde qaýipsizdik qaǵıdalaryn buzý, abaısyzda eki nemese odan da kóp adamnyń ólimine ákep soqqan is-áreket» baby boıynsha qarastyrylyp otyrǵan aıyby tolyq dáleldengenin atap kórsetti. Prokýror 2014 jyldan ken ornynda buryn alynǵan jerlerdegi qordy qulatý júıesimen óńdeý bastalǵanyn, biraq is júzinde qulatý júrgizilmegenin jetkizdi.
- Bul rette kásiporynnyń óńdelgen keńistikti betonmen toltyrýdy kózdeıtin 2011 jylǵy jobasy bolǵanyn, biraq kásiporyn bul jobadan aýytqyp 2013 jylǵy jumys qujattamasy boıynsha jumys istegenin, al ol is júzinde 2011 jylǵy jobanyń qosymshasy bolǵanyn, ýákiletti organda kelisýden ótpegenin atap ótken jón, - dedi prokýror Darına Zkrıanova.
Memlekettik aıyptaýshynyń pikirinshe, 2014-2027 jyldar kezeńinde ken ornyndaǵy qorlardy óńdeý jumystary tehnologııany buza otyryp júrgizilgen jáne onyń saldarynan bos keńistikter qalyp qoıǵan.
- Kóptegen adamdarda 2011 jáne 2013 jyldary sottalýshylar joǵaryda atalǵan laýazymdardy atqarmaǵan, endeshe olardyń kinási ne degen suraq týyndaıdy. Eń áýeli aldyńǵy joba 2017 jylǵy joba bekitilgenge deıin kúshinde boldy, osy kezeńde sottalýshylar kásiporyn qyzmetkerleri edi. Olar óńdelgen keńistikterdiń jaı-kúıin tehnıkalyq tekserý úshin sharalar qoldanbady, qulap ketý qaýpi joǵary, zerttelmegen ýchaskede tehnıkanyń qozǵalysyna jol berdi, - dep qosty prokýror.
Memlekettik aıyptaýshy taraptardyń jaryssózi barysynda 6 sottalýshyǵa qaýipsizdigi eń tómen kolonııada jazasyn óteýmen 4 jylǵa bas bostandyǵynan aıyrý jazasyn surady.
Aıta ketý kerek, sottalýshylar ózderine taǵylǵan bul aıyptardy joqqa shyǵaryp otyr.
Jaryssózden soń taraptar sotta sońǵy sózderin aıtady. Odan soń sot úkimi jarııa etiledi.
Eske sala keteıik, 2024 jylǵy 4 qańtarda altyn kenishinde ishinde adamdar bar avtobýs jer astyna túsip ketti.
Apat saldarynan tórt qutqarýshy erlikpen qaza tapty. Olar – Aıdos Shaımerden, Oleg Tyshkevıch, Sarqyt Berdihan jáne Aıyp Tileýbergenov.
Apattyń alǵashqy kúni eki qutqarýshynyń múrdesi tabylǵan edi.
Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatty.
Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandandy.
19 shildede Maıqaıyńda alty aıdan soń úshinshi qutqarýshynyń múrdesi tabylǵan edi.
25 shilde kúni Maıqaıyńdaǵy oıyqqa túsip ketken avtobýs tabylyp, jerdiń astyna túsip ketken sońǵy adamnyń denesi joǵaryǵa shyǵaryldy.
Keıin elorda soty qutqarýshylardyń ólimine jumys berýshi tarap kináli dep tanydy.
«Maıqaıyńaltyn» AQ-nyń altyn kenishinde tórt qutqarýshynyń ómirin qıǵan apatqa kináli tulǵalar retinde 6 adam ustaldy.
Baıanaýyl aýdandyq soty Pavlodar oblystyq ónerkásiptik qaýipsizdik departamentiniń burynǵy qos qyzmetkerine jaza taǵaıyndaǵany týraly jazǵanbyz.
Maıqaıyńdaǵy qaıǵyly oqıǵaǵa kináli tulǵalar 8 jylǵa bas bostandyǵynan aırylýy múmkin ekeni habarlandy.
Baıanaýyl aýdandyq sotynda isti qaraýshy sýdıa zeınetke ketýine baılanysty sot protsesi Ekibastuz qalalyq sotyna aýystyryldy.
Sondaı-aq «Altynalmas AK» kompanııasy «Maıqaıyńaltyndy» tolyqtaı satyp aldy.
Keıinirek Maıqaıyńdaǵy altyn kenishi naqty qunynan úsh ese arzanǵa satylyp ketkeni belgili boldy.
Al bıylǵy qazan aıynda Maıqaıyń altyn kenishinde qaza tapqan tórt qutqarýshynyń rýhyna memorıaldyq keshen ashyldy.