«Maıqaıyńaltyn» jer astyna túsip ketken avtobýsty izdeý jumystaryn ne sebepti toqtatty
PAVLODAR. KAZINFORM – Іzdestirý sharalary buǵan deıin kenishtiń ózine júktelgen bolatyn. Alaıda aqpan aıynyń sońynan kásiporyn basshylyǵy ony tolyqtaı doǵaryp tastaǵan.
Buǵan deıin jazǵanymyzdaı, qutqarýshylar kenish oıyǵyna qulaǵan avtobýsty izdeý jumystaryn aqpan aıynyń basynda toqtatyp, «Maıqaıyńaltyn» AQ shuńqyr túbine aýyr tehnıka ózdiginen júrip baratyndaı jol sala bastaǵan.
Alaıda jýyqta Maıqaıyń kenishindegi jer qazý jumystary toqtap qalǵany jaıynda aqparat tarady. Qurdymǵa qulaǵan avtobýsty izdeý jumystary ne sebepti toqtatylǵany týraly «Maıqaıyńaltyn» AQ bas dırektory Qýanysh Botın bizge bylaı dep túsindirdi:
«Aqpan aıynyń basynda qutqarýshylar ketip qaldy. Biz jer astynda jatqan qos azamattyń týystarynyń ótinishin eskerip, jer qazý jumystaryn óz kúshimizben jalǵastyramyz dep sheshtik. Aýyr tehnıkanyń kómegimen búıirlik transheıalar keńeıtilip, oıyqtyń túbine deıingi appareli tereńdetile bastady. Bul jumysty úsh aptadan asa júrgizdik. Alaıda mundaı is-sharalardy júrgizý úshin áýeli jer qazý jumystarynyń jobasy ázirlenýi kerek edi. Ony bizben turaqty baılanys ornatqan bir fırma bastapqyda jasap beremiz degen. Olar máseleni zerdeleı kelgende, jaǵdaıdyń asa kúrdeli ekenin eskerip, jaýapkershilikten bas tartty. Fırma ókilderiniń aıtýynsha, jer qazý jumystary barysyndaǵy qaýipsizdikti qamtamasyz etý óte qıyn. Al jobany ázirleýshi kompanııa ol jaýapkershilikti arqalaǵysy kelmeıdi. Sáıkesinshe, biz jumysty odan ári jalǵastyra almadyq. Aýyr tehnıka shuńqyr túbine tússe onsyz da qopsyp turǵan ken jynystary onyń salmaǵyn kótere almaı, opyrylyp túsýi múmkin. Budan adam shyǵyny bolýy da yqtımal. Osy jaǵdaılardyń barlyǵyn eskere kelip, aqpan aıynyń sońǵy aptasynda biz bastapqy sheshimimizdi ózgerttik. Al izdestirý jumystary aldaǵy ýaqytta jalǵasa ma, joq pa, ony aıta almaımyn. Sebebi bul bizdiń quzyrymyzdaǵy másele emes», - deıdi kásiporyn basshysy.
Qazir Qonaev atyndaǵy taý-ken isi ınstıtýtynyń mamandary kenish shahtalaryna túsip, olardyń qyzmetkerler úshin qanshalyqty qaýipsiz ekenin tekserip jatyr. Mamandar oń sheshim shyǵarsa, sáýir aıynda kenish qaıtadan jumysyn jalǵastyrýy múmkin.
Al óńirlik Tótenshe jaǵdaılar departamenti buǵan deıin kenishtegi jumystarǵa jumyldyrylǵan qyzmetkerler men tehnıkalar tolyqtaı óz qyzmet oryndaryna qaıtyp oralǵanyn habarlady. Qajet bolǵan jaǵdaıda departament mamandary Maıqaıyńǵa kómekke bara alady.
Eske sala keteıik, buǵan deıin «Maıqaıyńaltyn» AQ-nyń ken baıytý kombınaty qaıta iske qosylǵanyn jazǵan bolatynbyz.
