«Maıqaıyńaltyn» kenishindegi oqıǵa: mınıstrlik sońǵy málimetterdi habarlady

ASTANA. KAZINFORM – Tótenshe jaǵdaılar vıtse-mınıstri Baýyrjan Syzdyqov Pavlodar oblysyndaǵy «Maıqaıyńaltyn» AQ-nyń altyn kenishindegi oıyqqa túsip ketken avtobýsty shyǵarý jumystary qalaı júrip jatqanyn aıtty.

«Jaǵdaı óte kúrdeli, óıtkeni mamandar jerdiń skrınin túsirdi. Osy rette, olar avtobýstyń shamamen qaı jerde ornalasqanyn anyqtady, ıaǵnı qurylǵylar ol jerde shynymen metall bar ekenin kórsetip tur. Biraq, bul metaldyń astynda áli de bos keńistik bar. Sondyqtan bizdiń qutqarýshylarymyz, ákimdik pen basqa da memlekettik organdardan, arnaýly uıymdardan tartylǵan mamandar qazir óte qıyn jaǵdaıda jumys istep jatyr. Birinshiden, ol jerdegi temperatýra nólden tómen deńgeıde. Ekinshiden, qutqarýshylar men jumysshylardyń ómiri men densaýlyǵyna qaýip tónýi múmkin. Óıtkeni topyraq jyljysa, onda qazyp jatqan tehnıka tómen qaraı qulaýy múmkin. Avtobýstyń astyndaǵy bos keńistiktiń aýmaǵy qanshalyqty úlken ekenin naqty bilmeımiz», - dedi B. Syzdyqov Parlament Májilisinde tilshiler suraǵyna jaýap bere otyryp.

Sonymen qatar ol avtobýsty alyp shyǵý jumystarynda tıisti qaýipsizdik sharalary eskerilgenin aıtty.

«Barlyq qaýipsizdik sharasy oryndalyp jatyr. Qazir tehnıka avtobýs jatqan jerge búıirinen kire alady. Qazirdiń ózinde 2 myń tekshe metrden astam topyraq shyǵaryldy. Biz bes tekshe metrlik ekskavatordy túsirdik, ol avtobýs ústindegi topyraqty shyǵardy», - dep túsindirdi vıtse-mınıstr.

Eske salsaq, 4 qańtarda «Maıqaıyńaltyn» AQ-nyń altyn kenishindegi oıyqqa túsip ketken avtobýs jolaýshylarynyń ekeýiniń máıitin qutqarýshylar tapty.