«Maıqaıyńaltyn» kenishindegi oqıǵa: kóz jumǵan eki qutqarýshynyń aty-jóni belgili boldy

«Maıqaıyńaltyn» kenishindegi qaıǵyly oqıǵa kezinde qaza tapqan eki qutqarýshynyń esimderi ataldy, dep habarlaıdy Kazinform.

Buǵan deıin habarlaǵanymyzdaı, «Maıqaıyńaltyn» AQ-nyń altyn kenishindegi oıyqqa túsip ketken avtobýs jolaýshylarynyń ekeýiniń máıitin qutqarýshylar tapty.

Oqıǵa ornynda júrgen Pavlodar oblysynyń ákimi Asaıyn Baıhanov avtobýs ishinde bolǵan qutqarýshylardy izdeý jumystarynda kedergiler kóp ekenin jetkizdi. Oıyq shetindegi topyraq pen tastar qaıta-qaıta úgilip, qutqarýshylarǵa kedergi keltirip jatyr. 

- Qutqarý jumystarymen shuǵyldanyp júrgen azamattardyń ómirine qaýip tónbes úshin oıyqtyń aınalasyn tazartyp, bekittik. Qutqarýshylar topyraq arasynan 2 azamattyń múrdesin alyp shyqty. Olar – Sarqyt Berdiqan (1999 jylǵy) jáne Tyshkevıch Oleg Leonıdovıch (1970 jylǵy). Ózge eki qutqarýshyny izdeý jumystary jalǵasýda. Avtobýs tabylǵan joq. Avarııalyq-qutqarý jumystaryna óńirlik tótenshe jaǵdaılar departamentiniń, Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Pavlodar fılıalynyń, Jergilikti atqarýshy organdardyń barlyq kúshi men quraly jumyldyryldy. Barlyǵy 73 adam, 17 tehnıka jáne 1 dron jumys isteýde, - dep habarlady óńir basshysy.

Oqıǵanyń sebep-saldaryn QR Tótenshe jaǵdaılar mınıstrligi Ónerkásiptik qaýipsizdik komıtetiniń tóraǵalyq etýimen qurylǵan arnaıy komıssııa anyqtap jatyr.