«Maıqaıyńaltyn» kenishinde qaza tapqan tórt qutqarýshynyń isi boıynsha aldyn ala sot otyrysy bastalady
PAVLODAR. KAZINFORM — Pavlodar oblysy Baıanaýyl aýdandyq sotynda «Maıqaıyńaltyn» kenishinde qaza tapqan tórt qutqarýshynyń isi boıynsha aldyn ala sot otyrysy ótedi.
Pavlodar oblystyq sotynyń baspasóz qyzmeti búgin tórt qutqarýshynyń ómirin qıǵan apatqa kináli tulǵalarǵa qatysty aldyn ala sot otyrysy bolatynyn habarlady.
— Búgin Baıanaýyl aýdandyq sotynda «Maıqaıyńaltyn» kenishinde qaza tapqan tórt qutqarýshynyń isi boıynsha aldyn ala sot otyrysy ótedi. Otyrys saǵat 15.00-ge belgilengen. Aldyn ala tyńdaýlar ótýine baılanysty otyrys jabyq rejımde bolady, — dep málimdedi óńirlik sottyń baspasóz hatshysy Agıdel Ibraeva.
«Maıqaıyńaltyn» AQ-nyń altyn kenishinde tórt qutqarýshynyń ómirin qıǵan apatqa kináli tulǵalar retinde 6 adam ustalǵany týraly buǵan deıin jazǵanbyz. Olar — «Maıqaıyńaltyn» AQ-nyń burynǵy bas dırektory Qýanysh Botın, dırektordyń birinshi orynbasary Qanat Bashırov, orynbasary Ivan Tereshkov, Maıqaıyń jer asty kenishiniń dırektory Andreı Shývalov pen onyń orynbasary Berik Nazyrov, kenishtiń bas ınjeneri Dinmuhamed Qaıypqanuly.
Keıin olar sot sheshiminen ýaqytsha ustaý ızolıatorynan bosatylyp, úıqamaqqa jiberildi.
Olar tergeý amaldary aıaqtalǵansha úılerinde bolatyny aıtylǵan.
Al bıylǵy aqpan aıynda Baıanaýyl aýdandyq soty Pavlodar oblystyq ónerkásiptik qaýipsizdik departamentiniń burynǵy qos qyzmetkerine jaza taǵaıyndady. Olardyń biri departamenttiń memlekettik qadaǵalaý bóliminiń basshysy, ekinshisi bólimniń bas mamany bolyp qyzmet etken. Laýazym ıeleri 2016 jyly «Maıqaıyńaltyn» kásipornynyń jerasty shahtasyn tekserý barysynda jiberilgen salǵyrttyq úshin jaýapty dep tanylǵan. Atalǵan ýaqytta shahta ishindegi beton qospasyn tóseý erejeleriniń buzylǵany anyqtalǵanymen, tıisti sharalar qabyldanbaǵan. Keıin olar betonnyń shyn máninde quıylǵanyn teksermesten qajetti qujattarǵa qol qoıa salǵan. Bul nemquraılylyq 2024 jyly qaıǵyly oqıǵaǵa alyp kelgen.
Sot memlekettik qadaǵalaý bóliminiń burynǵy basshysyna úsh jyl merzimge bas bostandyǵyn shekteý jazasyn taǵaıyndady. Al bas mamannyń bas bostandyǵy 2 jylǵa shekteldi. Sondaı-aq bólim basshysy bolǵan azamat memlekettik qyzmette jáne qarjylyq uıymdarda eńbek etý quqyǵynan ómir boıyna aıryldy. Ekinshi aıyptalýshyǵa ónerkásiptik qaýipsizdik salasyndaǵy qadaǵalaý jáne baqylaý qyzmetine baılanysty laýazymdardy úsh jyl boıyna atqarýǵa tyıym salyndy.
Eske sala keteıik, 2024 jylǵy 4 qańtarda Pavlodar oblysyndaǵy Maıqaıyń altyn kenishinde ishinde adamdar bar avtobýs jer astyna túsip ketti.
Apat bolǵan kúni oqıǵa ornynan eki qutqarýshynyń múrdesi tabyldy.
Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatty.
Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandandy.
19 shildede Maıqaıyńda alty aıdan soń úshinshi qutqarýshynyń múrdesi tabylǵan edi.
25 shilde kúni Maıqaıyńdaǵy oıyqqa túsip ketken avtobýs tabylyp, jerdiń astyna túsip ketken sońǵy adamnyń denesi joǵaryǵa shyǵaryldy.
Keıin Elorda soty qutqarýshylardyń ólimine jumys berýshi tarap kináli dep tanydy.
Opat bolǵan bir qutqarýshynyń otbasy jumys berýshiden 120 mln teńge óndirip aldy.
Keıin sot «Maıqaıyńaltyn» kenishinde qaza bolǵan qutqarýshynyń isi boıynsha moraldyq ótemaqyny tórt ese kemitti.
Al 2024 jyldyń sońynda Pavlodar oblysynyń ákimi Maıqaıyńdaǵy apattyq úıler turǵyndaryna jańa baspana salynatynyn málim etti.
Baıanaýyl aýdaynynyń ákimdigi Maıqaıyńda apatty aımaqta turyp jatqan 273 adam qalaı kóshiritini týraly josparlarymen bólisti.
Sondaı-aq «Altynalmas AK» kompanııasy «Maıqaıyńaltyndy» tolyqtaı satyp aldy.