«Maıqaıyńaltynǵa» qarasty ken baıytý fabrıkasy 1 sáýirge deıin jumysyn toqtatady
PAVLODAR. KAZINFORM - Fabrıkanyń toqtaýyna qaldyq qoımadaǵy shıkizattyń taýsylýy sebep bolǵan. Al altyn kenishindegi jumystar apat bolǵan kúnnen beri toqtap tur.
Búgingi tańda «Maıqaıyńaltyn» AQ-da shtattaǵy qyzmetkerler sany 933 adamdy qurap otyr. Onyń ishinde 143 adam jyl saıynǵy eńbek demalysynda, 30 qyzmetker bala kútimine, 42 qyzmetker ýaqytsha eńbekke jaramsyzdyǵyna baılanysty demalysta. Taǵy 5 er azamat QR Qarýly Kúshteri qatarynda áskerı boryshyn ótep júr.
Buǵan deıin habarlaǵanymyzdaı, kenishtegi apat pen onyń mańyndaǵy úılerdiń máselesin prokýratýra qurǵan tergeý toby zerdelep jatqanyna baılanysty shahtadaǵy ken qazý jumystary 4 qańtardan beri qańtarylyp tur.
Soǵan baılanysty búgingi tańda jalaqysynyń 50%-y tólene otyryp 153 qyzmetkerdiń jumysy toqtap tur. Olar - shahtanyń 109 qyzmetkeri jáne taý-ken tehnıkasy ýchaskesinde jumys isteıtin 44 adam.
Endi osy aptanyń ortasynan, ıaǵnı 22-23 aqpannan bastap altyn kenishine qarasty ken baıytý fabrıkasynyń da jumysy ýaqytsha toqtaıdy.
Bul týraly Pavlodar oblysy eńbek basqarmasy basshysynyń mindetin atqarýshy Abylaı Sabyrov habarlady.
- «Maıqaıyńaltyn» AQ jumys berýshisiniń aýyzsha túsindirmesine sáıkes, qazirgi ýaqytta kásiporyn fabrıka jumysyn toqtatýǵa daıyndyq júrgizip jatyr. Shamamen bıylǵy jyldyń 22-23 aqpanynan bastap toqtatylady dep josparlanýda. Bul rette kásiporyn qyzmetkerlerine jalaqysynyń 50%-y tólenetin bolady. Jumysy ýaqytsha toqtatylatyn qyzmetkerlerdiń sany týraly aqparatty kásiporyn pysyqtaý ústinde. Naqty sanyn «Maıqaıyń-altyn» AQ basshylyǵy osy aptanyń sońyna deıin habarlaýy kerek. Jumys berýshiniń aqparaty boıynsha qyzmetkerlerdi tolyq jumystan bosatý máselesi qarastyrylmaǵan. Fabrıka bıylǵy jyldyń 1 sáýirinen bastap qaıtadan iske qosylady,-deıdi A.Sabyrov.
Belgili bolǵandaı, fabrıka 4 qańtarda shahta jumysyn toqtatqanyna baılanysty qaldyq qoımadaǵy shıkizatty paıdalanyp kelgen. Kenishtegi apattyń sebep-saldary tolyq zerdelenip bitkenshe shahta jabyq bolady. Soǵan sáıkes fabrıka da óz jumysyn jalǵastyra almaýda.
