«Maıqaıyńaltyn» AQ aýmaǵyndaǵy apatty tergeý jónindegi komıssııa nátıjelerin jarııalady
PAVLODAR. KAZINFORM – Arnaıy komıssııa 4-24 qańtar aralyǵynda tergeý júrgizdi. Komıssııa qutqarýshylardyń toptyq qaıǵyly jaǵdaıyna ákep soqtyrǵan oqıǵa boıynsha 7 tulǵany jaýapty dep tanyp otyr.
Atalǵan kezeń ishinde QR Tótenshe jaǵdaı mınıstrligi Ónerkásiptik qaýipsizdik komıteti tóraǵasynyń orynbasary Musa Tanabaevtyń tóraǵalyǵymen komıssııa músheleri jobalyq qujattamany zerdelep, tergeýge 4 saraptamalyq uıymdy, onyń ishinde Reseı Federatsııasynyń sarapshysyn tartyp, altyn óndirýshi kásiporynnyń kýágerleri men laýazymdy tulǵalary arasynda saýalnama júrgizdi. Sonymen qatar, komıssııa shahtaǵa túsip, oqıǵa ornyn zerttedi.
«Jan-jaqty tergeý júrgize otyryp, komıssııa taý-ken massasynyń qulaýy saldarynan oryn alǵan toptyq jazataıym oqıǵanyń sebepteri retinde kelesilerdi ataıdy:
- Jumys óndirisi qanaǵattanarlyqsyz deńgeıde uıymdastyrylǵan;
- Maıqaıyńaltyn» AQ jaýapty tulǵalary tarapynan taý-ken jumystarynyń qaýipsiz júrgizilýine óndiristik baqylaý tıisti túrde júzege asyrylmaǵan;
- Bloktardy óńdeý kezinde qazbalardyń qulaý protsesin baqylaý tıisinshe júzege asyrylmaǵan degen qorytyndyǵa keldi.
Sonymen qatar, bul bos oryndarǵa tıisti baqylaý júrgizilmegeni, jobalyq qujattamaǵa sáıkes ázirlengen tazartý keńistiginiń bos jerlerdiń qulaý yqtımaldylyǵy bar ekendigi nazarǵa alynbaǵany anyqtaldy.
Osynyń saldarynan kenetten taý massasy qulap, jazataıym oqıǵa oryn alǵan.
–Tergeý nátıjeleri boıynsha komıssııa músheleri jazataıym oqıǵanyń sebepterin joıý jónindegi is-sharalardy jáne olardyń oryndalý merzimderin aıqyndady. Onyń ishinde shahta dırektorynyń, bas ınjenerdiń, bas marksheıderdiń, ýchaskelik marksheıderlerdiń laýazymdyq nusqaýlyqtary ónerkásiptik qaýipsizdik salasyndaǵy zańnamanyń talaptaryn eskere otyryp qaıta qaralatyn bolady,-dep habarlady QR TJM Ónerkásiptik qaýipsizdik komıteti Pavlodar oblysy boıynsha departamentiniń basshysy Danııar Andasov.
Laýazymdy tulǵanyń aıtýynsha, budan basqa, taý-ken qazbalarynyń ónerkásiptik qaýipsizdik talaptaryna sáıkestigine egjeı-tegjeıli tekserý júrgiziletin bolady.
Qulaýy múmkin aımaqtardy jáne qaýipsizdik normalaryn qamtamasyz etýdi eskere otyryp, avtokólik qozǵalysynyń marshrýttary da ázirlenedi.
Komıssııa sheshimi boıynsha, toptyq jazataıym oqıǵanyń oryn alýyna kináli retinde 7 adam jaýapty dep tanylyp otyr.
Eńbek zańnamasyna sáıkes tergeý materıaldary quqyq qorǵaý organdaryna jiberildi.
Apat bolǵan jerde avarııalyq-qutqarý jumystary oqıǵa bolǵan sátten bastap demalys kúnderinsiz júrgizilýde. Topyraqty geologııalyq skanerleý jumysy merzimdi ýaqytta júrgizilýde. Jumystar óte qıyn jaǵdaılarda jalǵasyp jatyr. Taý jynystarynyń qulaý qaýpi jáne paıda bolǵan shuńqyrdyń astynda bos keńistikter bar.
