Maıqaıyń kenishindegi qutqarýshylardyń tehnıkalary eski, qural-jabdyqtary nashar bolǵan
PAVLODAR. KAZINFORM — Altyn kenishindegi oıyqqa avtobýspen birge qulap, qazaq tapqan qutqarýshynyń biri — Oleg Tyshkevıchtiń týystary sottan kásibı áskerılendirilgen avarııalyq-qutqarý qyzmetteriniń respýblıkalyq ortalyq shtabyn jaýapqa tartýdy surap otyr.
Baıanaýyl aýdandyq sotynda Maıqaıyń altyn kenishinde 4 qutqarýshynyń ólimine sebepker bolǵan qaıǵyly oqıǵa boıynsha qylmystyq istiń negizgi protsesteri ótip jatyr.
Sotta marqum qutqarýshy Oleg Tyshkevıchtiń qyzy ıAna Osolodkova kýáger retinde oqıǵaǵa qatysty ózi biletin jaıttarmen bólisti. ıAnanyń aıtýynsha, ol ákesimen sol kúngi qaıǵyly oqıǵadan jarty saǵat buryn sóılesken.
— Ákem marqum telefon arqyly sóıleskenimizde óziniń bul kúni rezervtik quramda bolǵanyn, demalys bólmesinde tynyǵyp otyrǵanyn aıtqan edi. Onyń qalaısha oqıǵa ornyna barýǵa pármen alǵany men úshin túsiniksiz. Bir sózben aıtqanda, ol oıyqqa qulaǵan álgi avtobýs salonynda bolýǵa tıis emes edi. Ákemdi jáne janyndaǵy serikterin apat ornyna zańsyz jibergen dep esepteımin. Olar jaýapsyzdyqtyń qurbany boldy. Al qyrshyn ketken Sarqyt Berdiqan degen jas jigittiń (1999 jyly týǵan) ondaı apattyq oqıǵaǵa baratyndaı tájirıbesi bolmaǵan. Jaqynda ǵana jumysqa turǵandyqtan ol kúrdeli qutqarý operatsııalaryna tipti úıretilmegen kórinedi. Al jumys berýshi — Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtabynda (KÁAQQ ROSh) qyzmetkerlerin mundaı iske úıretýge ruqsat beretin tıisti lıtsenzııasy joq ekenin anyqtadym. Sondyqtan bul jerde úlken zańsyzdyq bolǵan. Men bul sotta KÁAQQ uıymynyń da jaýapqa tartylýyn suraımyn, — dedi sotta ıAna Osolodkova.
ıAnanyń sózinshe, marqum ákesi jumysta únemi qutqarýshylardyń jetispeıtinine, tehnıkalardyń eskiligine shaǵymdanǵan. Onyń ústine arnaıy kıimderi de tozyǵy jetken, nashar kúıde bolǵan kórinedi.
— Avtobýsta arnaıy quraldardy qoıyp, respırator da bolmaǵan. «KÁAQQ ROSh» JShS jumys berýshi retinde qyzmetkerleriniń qaýipsizdigine jaýap berýi tıis. Alaıda men sotta olarǵa qatysty aıyptaý aktilerin kórmeı otyrmyn. Atalǵan qutqarý uıymyn jaýapqa tartý, tergeý júrgizý týraly óńirlik antıkor qyzmetine, prokýratýraǵa shaǵym túsirgenmin. Olardyń nátıjesi bolady degen úmittemin, — dep qosty ıAna Osolodkova.
Buǵan deıin Maıqaıyńdaǵy apatta qaza tapqan qutqarýshynyń qyzy ótemaqynyń durys tólenbegenine narazylyq bildirgeni týraly jazǵanbyz.
Keıin marqum O.Tyshkevıchtiń otbasy jumys berýshiden sot arqyly 120 mln teńge óndirip alǵysy kelgeni anyqtaldy.
Biraq sot «Maıqaıyńaltyn» kenishinde qaza bolǵan qutqarýshynyń isi boıynsha moraldyq ótemaqyny kemitip, onyń kólemin 7,5 mln teńge etip belgilegen.
Baıanaýyl aýdandyq soty buǵan deıin Pavlodar oblystyq ónerkásiptik qaýipsizdik departamentiniń burynǵy qos qyzmetkerine jaza taǵaıyndaǵany týraly jazǵanbyz. Olardyń biri departamenttiń memlekettik qadaǵalaý bóliminiń basshysy, ekinshisi bólimniń bas mamany bolyp qyzmet etken. Laýazym ıeleri 2016 jyly «Maıqaıyńaltyn» kásipornynyń jerasty shahtasyn tekserý barysynda jiberilgen salǵyrttyq úshin jaýapty dep tanylǵan.
Eske sala keteıik, 2024 jylǵy 4 qańtarda Pavlodar oblysyndaǵy Maıqaıyń altyn kenishinde ishinde adamdar bar avtobýs jer astyna túsip ketti.
Apat bolǵan kúni oqıǵa ornynan eki qutqarýshynyń múrdesi tabyldy.
Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatty.
Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandandy.
19 shildede Maıqaıyńda alty aıdan soń úshinshi qutqarýshynyń múrdesi tabylǵan edi.
25 shilde kúni Maıqaıyńdaǵy oıyqqa túsip ketken avtobýs tabylyp, jerdiń astyna túsip ketken sońǵy adamnyń denesi joǵaryǵa shyǵaryldy.
Keıin elorda soty qutqarýshylardyń ólimine jumys berýshi tarap kináli dep tanydy.
Apattan soń Maıqaıyńdaǵy «Shanhaı» shaǵyn aýdanynyń turǵyndary úılerimen qosa jer astyna túsip ketýden qorqatyndaryn aıtyp, dabyl qaqty.
Al 2024 jyldyń sońynda Pavlodar oblysynyń ákimi Maıqaıyńdaǵy apattyq úıler turǵyndaryna jańa baspana salynatynyn málim etti.
Baıanaýyl aýdanynyń ákimdigi Maıqaıyńda apatty aımaqta turyp jatqan 273 adam qalaı kóshiriletini týraly josparlarymen bólisti.
Sondaı-aq «Altynalmas AK» kompanııasy «Maıqaıyńaltyndy» tolyqtaı satyp aldy.
Óz kezeginde «Altynalmas» Maıqaıyń halqynyń ózekti máselelerin sheshýge yntaly ekenin habarlaǵan.
Al bıylǵy 28 sáýirde Baıanaýyl aýdandyq sotynda Maıqaıyń altyn kenishinde 4 qutqarýshynyń ólimine sebepker bolǵan qaıǵyly oqıǵa boıynsha qylmystyq isti qaraý bastaldy. Kináli tulǵalar 8 jylǵa bas bostandyǵynan aıyrylýy múmkin.