Maıqaıyń kenishindegi apat: kúdiktiler úıqamaqqa jiberildi
PAVLODAR. KAZINFORM - «Maıqaıyńaltyn» AQ men oǵan qarasty jerasty kenishiniń burynǵy basshylary sot sheshiminen ýaqytsha ustaý ızolıatorynan bosatylyp, úıqamaqqa jiberildi. Olar tergeý amaldary aıaqtalǵansha úılerinde bolady.
«Maıqaıyńaltyn» AQ-nyń burynǵy bas dırektory Qýanysh Botın, dırektordyń birinshi orynbasary Qanat Bashırov, orynbasary Ivan Tereshkov, Maıqaıyń jer asty kenishiniń dırektory Andreı Shývalov pen onyń orynbasary Berik Nazyrov, kenishtiń bas ınjeneri Dinmuhamed Qaıypqanuly keshe sottyń sheshiminen ýaqytsha ustaý ızolıatorynan bosatyldy. Tergeý amaldary aıaqtalǵansha olar úıqamaqta bolady.
Bul týraly Pavlodar oblysynyń Polıtsııa departamenti habarlady.
«Pavlodar oblysynyń polıtsııasy taý-ken jáne qurylys jumystaryn júrgizý kezinde qaýipsizdik erejelerin buzý faktisi boıynsha qylmystyq isti tergeý sheńberinde «Maıqaıyńaltyn» AQ-nyń alty jaýapty qyzmetkeri ustap, Pavlodar qalalyq polıtsııa basqarmasy ýaqytsha ustaý ızolıatoryna qamaýǵa alynǵan edi. Sot organynyń sheshiminen ustalǵandarǵa qatysty úıde qamaýda ustaý sharasy taǵaıyndaldy», - dep málimdedi departamenttiń baspasóz qyzmetinen.
Buǵan deıin Maıqaıyń kenishindegi apatqa kináli retinde 6 adam qamaýǵa alynǵany týraly jazǵan edik.
Eske sala keteıik, 4 qańtarda Pavlodar oblysyndaǵy Maıqaıyń altyn kenishinde ishinde adamdar bar avtobýs jer astyna túsip ketti.
Apat bolǵan kúni oqıǵa ornynan eki qutqarýshynyń múrdesi tabyldy.
Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatty.
Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandandy.
19 shildede Maıqaıyńda alty aıdan soń úshinshi qutqarýshynyń múrdesi tabylǵan edi.
25 shilde kúni Maıqaıyńdaǵy oıyqqa túsip ketken avtobýs tabylyp, jerdiń astyna túsip ketken sońǵy adamnyń denesi joǵaryǵa shyǵaryldy.
Keıin Elorda soty qutqarýshylardyń ólimine jumys berýshi tarap kináli dep tanydy.
Opat bolǵan bir qutqarýshynyń otbasy jumys berýshiden 120 mln teńge óndirip aldy.
