Maıqaıyń kenishinde apattan paıda bolǵan oıyq qalaı joıylady
PAVLODAR. KAZINFORM — «Maıqaıyńaltyn» AQ-ǵa qarasty jerasty kenishinde tórt qutqarýshynyń ómirin jalmaǵan alyp shuńqyrdy toltyrý jumystary 2026 jylǵa deıin jalǵasady.
Esterińizde bolsa, 2024 jyldyń 4 qańtarynda Pavlodar oblysynyń Baıanaýyl aýdanyndaǵy «Maıqaıyńaltyn» AQ shahtasynyń janynda topyraq opyrylyp, saldarynan ishinde 4 qutqarýshy bar avtobýs tazartý keńistigine qulap ketti. Alǵashqy kúni eki qutqarýshynyń denesi birden tabylyp, joǵaryǵa shyǵarylǵan. Alaıda ózge eki qutqarýshynyń múrdeleri uzaq ýaqyt izdelip, aqyr sońynda avtobýspen birge qazyp alynǵany málim.
Kásiporynnyń bas dırektory Danıal Nábıevtiń aıtýynsha, «Maıqaıyńaltyn» AQ-nyń ınvestory aýysqan sátten basshylyq apattyq oıyqty toltyrýǵa sheshim qabyldaǵan.
— Bul jerde jer astyndaǵy bos keńistikke túsip ketken topyraq massasy asa kóp kólemde. Aýmaq shahta janynda bolǵandyqtan bizdiń qyzmetkerlerimizdiń qaýipsizdigine de nuqsan keltiredi. Qazirgi ýaqytta shahtadan shyqqan paıdasyz jer jynystary júk kólikterine tıelip, shuńqyr mańaıyna tógilip jatyr. Ony úlken býldozerler oıyqqa ıterip túsiredi. Oıyqty toltyrý jáne tegisteý jumystary 2026 jyly aıaqtalady dep josparlanǵan, - deıdi Danıal Nábıev.
Altyn kásiporny búginde kendi atalǵan kenishten jáne fabrıka janynda jyldar boıy úıilip qalǵan qaldyqtan alyp jatyr. 2014 jyly toqtap qalǵan «Alpys» kenishin qaıtadan iske qosý jumystary qolǵa alynǵan.
Eske sala keteıik, «Maıqaıyńaltynǵa» jańa basshy taǵaıyndaldy.
Jańa ınvestor — «Altynalmas» kompanııasy Maıqaıyń halqynyń ózekti máselelerin sheshýge yntaly.