Maıqaıyń altyn kenishindegi apat: 6 adam qamaýǵa alyndy

PAVLODAR. KAZINFORM — «Maıqaıyńaltyn» AQ-nyń burynǵy bas dırektory Qýanysh Botın jáne kásiporyndaǵy óndiristik ýchaskelerdi basqarý, ınjenerlik quramdaǵy bes adam ýaqytsha ustaý ızolıatoryna qamaldy. Sot olardy úıqamaqta ustaý nemese túrmege jabý týraly sheshim shyǵarady dep kútilip otyr.

«Maıqaıyńaltyn» AQ-nyń altyn kenishinde tórt qutqarýshynyń ómirin qıǵan apatqa kináli tulǵalar retinde 6 adam ustaldy. Olar — «Maıqaıyńaltyn» AQ-nyń burynǵy bas dırektory Qýanysh Botın jáne óndiristik ýchaskelerdi basqarý, ınjenerlik quramdaǵy bes adam.

Pavlodar oblystyq polıtsııa departamenti atalǵan derekti rastady.

— Pavlodar oblysynyń polıtsııasy taý-ken jáne qurylys jumystaryn júrgizý kezinde qaýipsizdik erejelerin buzý faktisi boıynsha qylmystyq isti tergeý sheńberinde «Maıqaıyńaltyn» AQ-nyń alty jaýapty qyzmetkeri ustap, Pavlodar qalalyq polıtsııa basqarmasy ýaqytsha ustaý ızolıatoryna qamaýǵa alyndy. Tergeý amaldary jalǵasyp jatyr, - dep málimdedi departamenttiń baspasóz qyzmetinen.

Derek kózderine súıensek, burynǵy bas dırektor Qýanysh Botın Ekibastuzdaǵy úıinde ustalǵan.

Eske sala keteıik, 4 qańtarda Pavlodar oblysyndaǵy Maıqaıyń altyn kenishinde ishinde adamdar bar avtobýs jer astyna túsip ketti. 

Apat bolǵan kúni oqıǵa ornynan eki qutqarýshynyń múrdesi tabyldy. 

Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatty.

Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandandy. 

19 shildede Maıqaıyńda alty aıdan soń úshinshi qutqarýshynyń múrdesi tabylǵan edi. 

25 shilde kúni Maıqaıyńdaǵy oıyqqa túsip ketken avtobýs tabylyp, jerdiń astyna túsip ketken sońǵy adamnyń denesi joǵaryǵa shyǵaryldy.

Keıin Elorda soty qutqarýshylardyń ólimine jumys berýshi tarap kináli dep tanydy.

Opat bolǵan bir qutqarýshynyń otbasy jumys berýshiden 120 mln teńge óndirip aldy.