Maıqaıyń altyn kenishinde qaza tapqan tórt qutqarýshynyń rýhyna memorıaldyq keshen ashyldy
PAVLODAR. KAZINFORM - Keshende 2024 jyldyń qańtar aıynda oıyqqa qulap qaza tapqan taý-ken qutqarýshylarynyń esimi tasqa qashap jazylǵan.
«Maıqaıyńaltyn» kenishi aýmaǵynda ózgeniń ómirin qutqarý jolynda baqılyq bolǵan batyr qutqarýshylardyń rýhyna arnalǵan memorıal ashyldy.
2024 jylǵy 4 qańtarda altyn kenishinde ishinde adamdar bar avtobýs jer astyna túsip ketkeni málim. Apat saldarynan tórt qutqarýshy erlikpen qaza tapty. Olar – Aıdos Shaımerden, Oleg Tyshkevıch, Sarqyt Berdihan jáne Aıyp Tileýbergenov.
- Taý-ken qutqarýshysy – eń qaýipti ári qurmetti mamandyqtardyń biri. Olar ár saparǵa óz ómirin qaterge tige otyryp, ózgelerdiń ómirin qutqarýǵa attanady. Olar – naǵyz batyrlar. Olardyń erligi máńgi este saqtaýǵa laıyq. Osynaý syn sátinde birge bolyp, qıyndyqty birge eńsergen kent turǵyndaryna sheksiz alǵysymyzdy bildiremiz. Batyrlarymyzdyń erligi bolashaq urpaqqa janqııarlyqtyń úlgisi bolyp qala beredi, - dedi memorıaldyq eskertkishtiń ashylýynda Pavlodar oblysy ákiminiń birinshi orynbasary Serik Batyrǵujınov.
Marqum qutqarýshy Aıdos Shaımerdenniń jary Nursulý Shaımerden sheıit bolǵan batyrlarymyzdyń rýhyna kórsetilgen qurmet úshin kópshilikke rızashylyǵyn jetkizdi. Jınalǵandar memorıaldyq keshenge gúl shoqtaryn qoıyp, taǵzym etti.
Eske sala keteıik, Maıqaıyń altyn kenishindegi qaıǵyly apattyń alǵashqy kúni eki qutqarýshynyń múrdesi tabylǵan edi.
Keıin qutqarýshylar topyraqtyń jıi qozǵalýyna baılanysty jer qazý jumystaryn toqtatty.
Al mamyr aıynda Maıqaıyń altyn kenishinde qos qutqarýshyny izdeý jumystary qaıta jandandy.
19 shildede Maıqaıyńda alty aıdan soń úshinshi qutqarýshynyń múrdesi tabylǵan edi.
25 shilde kúni Maıqaıyńdaǵy oıyqqa túsip ketken avtobýs tabylyp, jerdiń astyna túsip ketken sońǵy adamnyń denesi joǵaryǵa shyǵaryldy.
Keıin Elorda soty qutqarýshylardyń ólimine jumys berýshi tarap kináli dep tanydy.
«Maıqaıyńaltyn» AQ-nyń altyn kenishinde tórt qutqarýshynyń ómirin qıǵan apatqa kináli tulǵalar retinde 6 adam ustaldy.
Baıanaýyl aýdandyq soty Pavlodar oblystyq ónerkásiptik qaýipsizdik departamentiniń burynǵy qos qyzmetkerine jaza taǵaıyndaǵany týraly jazǵanbyz.
Sondaı-aq «Altynalmas AK» kompanııasy «Maıqaıyńaltyndy» tolyqtaı satyp aldy.
Qazirgi ýaqytta apattyq oqıǵa boıynsha qylmystyq is Ekibastuz qalalyq sotynda qaralyp jatyr.