Maıqaraǵaı ormandarynda sanıtarlyq aǵash kesýge ýaqytsha tyıym salý usynyldy
«Kásipkerler moratorıı kezinde osyndaı bir qýlyqty taýyp aldy. Olarǵa bárin resmı túrde istegenshe, sanıtarlyq kesý arqyly «delovoı» aǵashty jınap alǵan jeńil. Al «sanıtarlyq kesý» degen ne? Bul qýraǵan jáne aýrý aǵashtardy kesip tastaý degen sózdi bildiredi. Alaıda orman paıdalanýshylary olaı istep jatqan joq. Olarǵa ormannyń ishine kirip, aýrý aǵashtardy keskenshe shetinen saý aǵashtardy alyp ketken tıimdi bolyp tur», - deıdi QR AShM janyndaǵy qoǵamdyq keńestiń múshesi Serik Turymbaev.
Búginde sanıtarlyq kesý salasyndaǵy zańsyz áreketterdiń basym bóligi maıqaraǵaı ósetin aımaqtarda bolyp jatady. Osyǵan baılanysty aýyl sharýashylyǵy mınıstriligi Shyǵys Qazaqstan oblysynyń maıqaraǵaı aımaqtarynda sanıtarlyq aǵash kesýge ýaqytsha tyıym salýdy usynyp otyr. Osy ispetti shekteýdi elimizdiń basqa da oblystarynda engizýdi kózdeıdi. Sebebi sanıtarlyq aǵash kesýdiń kólemi jyl saıyn ósip keledi. Al tutyný kólemi kóp ózgerip jatqan joq. Osynyń ózi sanıtarlyq kesý júıesin aqsha tabýdyń bir kózi retinde paıdalanyp jatqanyn anyq kórsetse kerek. Qazirgi jaǵdaı jalǵasa berse, elimizdiń maıqaraǵaı ormandary taqyrǵa aınalýy ábden múmkin.
Maıqaraǵaı aımaqtarynda sanıtarlyq aǵash kesýge tyıym salynsa da, aǵashtyń basqa túrleri boıynsha shekteý bolmaıdy. Osy oraıda mınıstrlik qylqan japyraqty aǵashtar sharýashylyǵyna basymdyq berýdi kózdeıdi. Bundaı ózgerister kásipkerlik ortaǵa eshqandaı qıyndyq týǵyzbaýy tıis. Aýylsharýashylyǵy vıtse-mınıstri Erlan Nysanbaevtyń aıtýynsha, osy ýaqytqa deıin ótken kelissózder kezinde orman ıelenýshileri men paıdalanýshylary qazirgi bastamaǵa qarsylyq bildirgen joq. Degenmen, ony iske asyrý úshin zań júzinde bekitip alýqajet. Ol úshin mınıstrlik arnaıy zań jobasyn Májilis pen Senat talqylaýlarynan ótkizýi tıis.