Maıqan balyǵyn satýǵa zańdy túrde tyıym salynady - mınıstr

NUR-SULTAN. QazAqparat – Qazaqstanda maıqan balyǵyn satýǵa zańdy túrde tyıym salynady. Atalǵan shara Marqakól kólindegi brakonerliktiń aldyn alýǵa baǵyttalǵan, dep habarlaıdy QazAqparat tilshisi.

«Birinshiden, maıqandy zańsyz aýlaý jaǵdaıy azaımaı tur. Ekinshiden, ol balyqty sýquzǵyn keremet aýlaıdy. Jergilikti turǵyndarǵa maıqandy aýlaýǵa ruqsat berilgen. Belgili bir lımıt bar. Alaıda, osy múmkindikti teris paıdalaný jaǵdaıy barshylyq. Bul máseleni retteý úshin zańnamaǵa ózgeris engizý kerek. Naqty osy sharýany qolǵa almaqpyz. Máselen, maıqan balyǵyn satýǵa tyıym salynady», - dedi Ekologııa, geologııa jáne tabıǵı resýrstar mınıstri Maǵzum Myrzaǵalıev vedomstvonyń alqa otyrysynan keıin tilshilerge bergen jaýabynda.

Ol sonymen qatar, mınıstrlik ózge de baqylaýshy organdarmen maıqandy satý úshin aýlanýyna jol bermeý kerektigin atap ótti.

«Sýquzǵyn boıynsha aıtarym, Marqakólde atalmysh qustyń sanyn retteý úshin eki sharýany qolǵa alý kerek. Birinshiden, zańnamaǵa ózgeris engizip, ol qustardyń sanyn rettep otyrý múmkindigin qarastyrǵan jón. Ekinshiden, sýquzǵyndardyń sany bıologııalyq negizdemege saı rettelip otyrýy tıis», - dedi ol.

Qazirgi ýaqytta Marqakólde sýquzǵyndardyń sany edáýir artyp ketken.

«Zańnamaǵa tıisti ózgeristerdi engizemiz. Sonymen qatar, bıologııalyq negizdeme boıynsha jumys ta júrip jatyr. Marqakólde qazirgi tańda naqty qansha sýquzǵyn baryn anyqtap alýymyz kerek. Osyny eskere kele sýquzǵynnyń sany azaıyp ketpeıtindeı jáne balyqqa da zor shyǵyn kelmeıtindeı sharýanyń retin tabýǵa tıispiz», - dedi mınıstr.

Eske sala ketsek, osy jyldyń shilde aıynda QR Prezıdenti Qasym-Jomart Toqaev Shyǵys Qazaqstan oblysynyń Marqakól kólinde zańsyz balyq aýlap júrgen qylmystyq toppen kúresýdi tapsyrǵan bolatyn.

Keıin Іshki ister mınıstrligi arnaıy operatsııa barysynda Marqakólde zańsyz balyq aýlap kelgen qylmystyq top ustalǵanyn habarlady.