Maık Taıson jol apatynan zardap shekken mototsıklshige kómektesti
ASTANA. QazAqparat - Ataqty amerıkalyq boksshy, asa aýyr salmaqtaǵy burynǵy absolıýttik chempıon, kóbinese óziniń jaǵymsyz qylyqtarymen basylymdardy shýlatyp júretin Maık Taıson ózin jańa qyrynan tanytty.
Ol jol-kólik apatynan zardap shekken mototsıklshige kómektesti, dep habarlaıdy jergilikti BAQ.
Oqys oqıǵa ótken senbide Las-Vegasqa baratyn jolda bolǵan. Mototsıklshi Raıan Cheslıdi taksı qaqqan.
Bul keleńsiz jaǵdaıǵa kýá bolǵandardyń biri Taıson bolyp shyqty. Burynǵy boksshy jol qozǵalysyn toqtatyp, dárigerler kelgenshe 29 jasar jas jigitke kómektesip, sodan keıin ǵana ketken. Mototsıklshi Maıkti uıaly telefonyna túsirip alǵan.
Dárigerler onyń aıaq-qolynyń synǵanyn anyqtady.
Ózine kómekteskeni úshin álgi jigit Taısonnyń atyna alǵysyn bildirgen hat pen jemis-jıdekke toly sebet jibergen.
