Maık Taıson Otello rólin somdaǵysy keledi
ASTANA. QazAqparat - Belgili amerıkalyq boksshy Maık Taıson Ýılıam Shekspırdiń pesasyndaǵy Otello rólin oınaǵysy keletinin málimdedi. Bul týraly Mirror habarlady.
Taıson ázirge teatr sahnasyna shyǵýǵa ázir emestigin, aldymen televıdenıede jumys isteýdi josparlap júrgenin aıtty.
«Shekspır keıipkerlerin somdaǵym keledi. Kimdi ekenin naqty bilmeımin, alaıda Otello rólin oınasam deımin», - dep gazette boksshynyń sózi keltirilgen.
«Shekspırdiń pesasynda oınasam, keremet emes pe? Men sııaqty qara jigit... Meni Otello retinde elestete alasyńdar ma?» - dedi ol jýrnalısterge Las-Vegasta Soul Train Awards mýzykalyq syılyǵyn tabystaý kezinde.
Taıson 55 fılmge túsken, onyń ishinde ózin somdaǵan kıno da bar. «Malchınshnık v Vegase» fılminiń birinshi, ekinshi bólimderine túsken. Aldaǵy ýaqytta eki kartınasy prokatqa shyqpaq.
