Maık Taıson boksqa oralýy týraly: Tósekten bir apta tura almadym

NUR-SULTAN. QazAqparat – Boks áleminde aty ańyzǵa aınalǵan 54 jastaǵy Maık Taısonnyń bir nemese birneshe jekpe-jek ótkizý úshin boksqa qaıtyp oralatyny týraly jańalyǵyn kópshilik qyzý talqylaýda. Boksshy kishi Roı Djonspen jekpe-jekke shyǵatyny týraly kelisti. Bul týraly QazAqparat Sport.kz saıtyna silteme jasap habarlaıdy.

Bári Maıktyń bir snarıadty shıraq soqqylap otyrǵany jazylǵan qysqa vıdeodan bastalǵan.

«Senderge birdene aıtaıyn. Qysqasy, men bul 30 sekýnd vıdeony jazyp alǵannan keıin bir apta tósek tartyp qaldym. Bul kúlkili jaǵdaı emes», - dedi Taıson.

Maık boksqa oralý ıdeıasy qaıdan shyqqany eske aldy.

«Men zaıybymmen artyq salmaǵym týraly áńgimelesken edim. Ol maǵan: «Júgirý trenajerimen kúnine 15 mınýt jattyqsań qaıtedi?» degen. Aqyry sol 15 mınýt kúnine 2 saǵat jattyǵýǵa aınaldy», - deıdi Maık.

«Men salmaqtan aryla bastadym. Sosyn kúıeýbalam maǵan 30-40 mıllıon dollar úshin judyryqtasýǵa usynys bolyp jatqanyn jetkizdi. Ol maǵan bul adamnyń Bob Sap ekenin aıtty. Aqyry, biz onymen judyryqtasatynymyz týraly kelistik. Daıyndyq pen ózińdi qalpyna keltirý – eki túrli nárse. Ózińdi qalpyna keltirý – bul kúndelikti kıimińdi kıgenmen teń. Al burynǵy qalpyna oralý – óz janyńnyń syrtyna shyǵyp ketkenmen birdeı. Buny avtomatty túrde jasaý múmkin emes», - dep atap ótti Maık Taıson.

Eske salsaq, buǵan deıin Maık Taıson men kishi Roı Djonstyń jekpe-jegi 12 qyrkúıekte Kalıfornııada (AQSh) ótetindigi týraly habarlaǵan bolatynbyz.