Maık Taıson bala kezinde qaskúnemniń qurbany bolǵanyn aıtty
ASTANA. QazAqparat - Ataqty boksshy Maık Taıson «Opie Radio» radıo stantsııa efırinde basynan ótken tańqalarlyq oqıǵany baıandap berdi, dep jarysa jazdy sheteldiń BAQ.
Ol radıo habarda bala kezinde zorlyq-zombylyq qurbany bolǵanyn málimdedi.
Taısonnyń aıtýynsha, ol ne bary jeti jasynda kóshede eresek adam ustap alyp, adam júrmeıtin jerge súırep aparyp, uzaq ýaqyt jábirlep, mazaq etip qorlaǵan. Taıson qylmyskerden áreń qashyp qutylǵanyn aıtty.
Sportshy mundaı jaǵdaı onyń ómirinde ekinshi qaıtalanbaǵanyn, balalyq shaqtyń qorqynyshty elesi sanasynda qalsa da, qazir sol oqıǵa úshin ózin uıatty sezinbeıtinin málimdedi.
1992 jyly Maık Taıson zorlyq-zombylyq jasaǵany úshin alty jylǵa bas bostandyǵynan aıyrylǵan. Ol joly jarty merzimin ótegen. Sodan keıin de Taıson ár túrli sebeptermen birneshe ret sot aldynda jaýap bergen.
