Maık Djonson AQSh Kongresi Ókilder palatasynyń spıkeri bolyp qaıta saılandy

ASTANA.KAZINFORM — Respýblıkashyl Maık Djonson bir ǵana daýys artyqshylyǵymen AQSh Ókilder palatasynyń spıkeri laýazymyna qaıta saılandy, dep jazady BBC.

Juma kúni Ókilder palatasy qarashadaǵy saılaýda saılanǵan jańa múshelermen alǵash ret kezdesti. Ol óz jumysyn spıker saılaýynan bastaýy kerek edi.

Qazir respýblıkashyldarda 219 kongresmen bar, al demokrattarda — 215. Alaıda, 119-shy sessııa bastalmaı turyp keıbir partııa músheleri Djonsonnyń jumysyna narazy bolyp, ony jańadan saılanǵan prezıdent Donald Tramp belsendi túrde kótermelegenine qaramastan, ornyn aýystyrýǵa árekettendi.

— Maık tamasha spıker bolady, elimiz budan tek paıda kóredi. Amerıkalyqtar parasattylyqty, kúsh pen kóshbasshylyqty tórt jyl kútti, — dedi Tramp áleýmettik jelidegi jazbasynda.

Alǵashqy kezdesýge Djonsonnyń birneshe respýblıkashyl qarsylastary kelmedi. Al jeńimpaz keminde 218 daýys jınaýy kerek edi. Djonsonnyń kandıdatýrasyna demokratııalyq fraktsııanyń jetekshisi Hakım Djeffrıs qarsy boldy.

Soǵan qaramastan úsh respýblıkashyl bolashaq prezıdent úndeýin elemeı, Djeffrıske daýys berip, ishki partııalyq qaqtyǵysqa tústi.

Zalda eki mınýttaı úzilis boldy, sodan keıin eki qarsylas óz pikirin ózgertkenin habarlady. Osylaısha Djonson bir daýys basymdyqpen spıker bolyp saılandy.

Eske sala keteıik, buǵan deıin ınaýgýratsııadan 10 kún buryn Trampqa úkim shyǵatynyn jazǵan bolatynbyz.