Máıitterdi zertteýden aqsha tapqan paraqorlar ustaldy

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi patologoanatomdyq qyzmetke zańsyz jarnama jasap, sol úshin para alǵan sot saraptama ınstıtýtynyń basshylyǵyn quryqtady, dep xabarlaıdy QazAqparat tilshisi. 

Agenttiktiń resmı ókili Nurlan Jaxınniń sózine qaraǵanda, «Qaraǵandy oblysy boıynsha sot saraptamasy ınstıtýty» RMKK-niń dırektory Ibatov jáne onyń orynbasary Narmaǵambetov parany júıeli túrde alyp otyrǵan.

"Olar óz laýazymyn paıdalanyp, marqum bolǵandardyń týysqandaryna aqyly túrde patologoanatomııalyq zertteý qyzmetin kórsetetin jeke uıymǵa barýǵa keńes bergen. Sol úshin atalǵan uıymnan 35-40 myń teńge kóleminde para alyp otyrdy. Ekeýi óz kinásin moıyndady. Osyǵan baılanysty kúdiktilerge qatysty protsessýaldyq ustaý sharasy qoldanylǵan joq. Tergeý júrgizilýde", - dedi N.Jaxın Astanada ótken baspasóz máslıxatynda.