Máıitter saraptamada, janazalary týraly eshteńe aıta almaımyz - qaza bolǵan aǵaıyndylardyń týystary
ALMATY. QazAqparat - Baýyrlarymyzdyń máıtterin áli alǵanymyz joq, deıdi Almaty oblysy Uzynaǵash aýylynda mal satyp, keıin iz-túzsiz joǵalyp ketken jigitterdiń týysqany Tursyn Álimhan «QazAqparat» tilshisine.
«Máıitterdi saraptamaǵa alyp ketken. Áli bergen joq. Janazalary týraly eshteńe aıta almaımyz. Ustalǵandardyń aty-jónin bizge áli aıtqan joq», - dedi Zarlyhanuly Muqııat pen Álimhan Qadylbektiń aǵaıyny Tursyn Álimhan.
Eske sala keteıik, ótken jeksenbide BAQ-ta Almaty oblysy Jambyl aýdanynda mal saýdasymen aınalysyp júrgen úsh jigittiń joǵalyp ketkeni týraly habarlanǵan bolatyn.
Marqumdardyń týysqandarynyń aıtýynsha, Doldanuly Jarqynbek (1979 jyly týǵan), Zarlyhanuly Muqııat (1973 jyly týǵan), Álimhan Qadylbek Shyǵys Qazaqstan oblysynyń Tarbaǵataı aýdanynan satyp alǵan 40 bas maldy eki júk kóligimen 17 qyrkúıek kúni Uzynaǵash bazaryna shyǵarǵan. Sodan keıin olar iz-túzsiz joǵalyp ketken.
Eske salaıyq, búgin Almaty oblystyq Іshki ister departamentiniń baspasóz qyzmetinen iz-tússiz joǵalǵan úsh aǵaıyndynyń ólimine kúdiktiler ustalǵany habarlandy.
«Oblystyq ІІD basshysynyń birinshi orynbasary podpolkovnık Nurlan Másimov basshylyq etken izdeý sharalaryna aýdandyq jáne aımaqtyq polıtseıler de jumyldyryldy. Joǵalǵandardy óltirdi degen kúdikpen Jambyl aýdanynyń eki azamaty ustaldy. Jábirlenýshilerdiń deneleri tabyldy. QR QK 99-baby, 2-bólimi boıynsha (Kisi óltirý) qylmystyq is qozǵaldy», - delingen baspasóz qyzmetiniń habarynda.
Kisi óltirý faktisi boıynsha tergeý jumystary Almaty oblystyq Іshki ister departamenti basshylyǵynyń qatań nazarynda.
